Plastic Free City-ah Aizawl puan a ni

Aizawl Municipal Corporation (AMC) mayor PC Lalhmingthanga chuan Aizawl khawpui chu Plastic Free City a nih thu a puang. Ministry of Urban Development (MoUD)-in India rama Smart City atana thlan khawpui 100-te chu October 2, 2019 aṭang­in Plastic Free City-ah inpuang (declare) vek turin a ti a ni.

Plastic Free City-a puanna inkhawm hi nimin khan AMC Conference Hall-ah neih a ni a; PC Lalhmingthanga chuan, prime minister Narendra Modi-a'n plastic a vei thu leh, Independence Day 2019-a a thusawiah pawh October 2, 2019 aṭangin India ramah plastic khap vek tum a nih thu a lo sawi tawh tih a sawi.

Aizawl Mayor chuan, Aizawl khawpui chu khawpui dang ai pawha hma la hmasa leh hma la chak zawk nia a hriat thu sawiin, "Plastic khapna AMC-in a kalpui meka mipui ṭawiawmna leh AMC councillor leh thawktu zawng zawngte ṭanrualna avangin Aizawla plastic khap chinte hmuh tur a tlem ta duak a, thil chhinchhiah tlak leh lawmawm tak a ni. Plastic Free City-a declaration siam a nih hnua AMC hmalak zel dan tur chu la rèl chhunzawm a ni ang," a ti.

PC Lalhmingthanga chuan, August 1, 2019 aṭangin Aizawlah micron 50 aia pan plastic bag-te khap ṭan a nih thu te, chumi hnuah plastic bag chi hrang hrang 2,00,000 chuang man a nih tawh thu te, kumina World Environment Day-ah Ai­zawla mi 60,000 chuang plastic bawlhhlawh chhar khawma an hnatlan thu te, plastic bag man khawmte tihralna turin tender chhuah mek a nih thute a sawi bawk. Declaration inkhawmah hian AMC councillor-te leh AMC-a thawkte an tel a; AMC commissioner Dr H Lalthlangliana'n plastic bag, micron 50 tling lo khap chungchanga AMC hmalakna a sawifiah.