Fit India Plogging Run huaihawt

School Education department chuan Mahatma Gandhi pian champha vawi 150-na pualin October 2, Nilaini khan Aizawl­ah Fit India Movement hnuaiah ‘Fit India Plogging Run’ an huaihawt a, Aizawla higher secon­dary school hrang hrang aṭangin zirlai 1,000 chuang an tel.

Fit India Plogging Run hi hmun hnih - Chanmari kawn leh Kulikawn aṭanga ṭan a ni a; Chanmari kawn aṭanga tlante chu School Education joint director (Secondary) C Hrangṭhuama'n a vailiam a, Kulikawn aṭanga ṭante chu joint director (Elementary) Lalhmachhuana'n a vai liam a ni. Run-a telte chuan kawng laka plastic bawlhhlawhte an chhar nghal a, Secretariat Annex, Treasury Square-ah an intâwk khawm a ni.

Fit India Movement hi August 29, 2019-a ram puma infiamna pawimawhzia inzirtirna ni, National Sports Day-ah prime minister Narendra Modi-a'n New Delhi-ah a hawng a; ram mipuite'n hriselna atana infiamna leh taksa sâwizawi pawimawhzia an hriat tharna atana buatsaih a ni.