Affidavit dik lo thehluta puhna thubuaiah CM hlui Lal Thanhawla'n thiam chang

Court order-ah chuan, thubuai thehluttuin Lal Thanhawla s/o Hmartawnphunga, Zarkawt, Aizawl a puhnaah ṭan chhan leh thubuai neitu thiam loh chantirna khawp finfiahna a pek theih loh thu tarlan a ni a; "A (Lal Thanhawla) fihlîm tih ka puang a, he thubuai aṭang hian zalenna ka pe nghal bawk. He order hmang hian criminal complaint no. 1/18 chu tihtawp a ni," tih a ni.

Order-ah chuan, 2013 Mizoram inthlanpuia Lal Thanhawla affidavit thehluh chu ngun taka zir chian a nih hnuah, dik kim lo lai awm mah se, Lal Thanhawla'n rilru dik lo púa ti (ill intention) a nih loh thu te, Lalhriatrenga Chhangte-in convict tura a khin tel loh thute tarlan a ni bawk. 

Court-in nimin chhuna thutlukna a puan lai hian Lal Thanhawla chu Court chhungah a awm a, Court tualah Congress mi leh sa eng emaw zatin an ṭawiawm. Thubuai thehluttu Lalhriatrenga pawh Court-ah a awm bawk.

Lal Thanhawla Ukil Lalremsanga Nghaka chuan zawhna chhangin, "False affidavit chungchangah Court-in a sawi ber chu, RP Act 125-A hnuaia offence a tling lo, tihluihna emaw, rilru ṭha lo pûa tih a ni lo, ill intention a awm lo tih kha trial-ah kan prove a, kan chak ta a ni," a ti.

Lalhriatrenga Chhangte pawhin chanchinbumite zawhna chhangin, "Kan khinnaah khan táng tur emaw, pawisa chawi turin kan ti lo a, mipui bum tumna pawh a nei lo a ni," a ti. A tum ber chu, false affidavit a nih leh nih loh finfiah a nih thu sawiin, "Ill intention-a ti a ni tiin kan hnial duh lo a, Pu Hawla hi a rilru a chhe êm a, ti zawngin kan ti lo," a ti a; Court sang zawkah khin chhunzawm a tum tawh loh thu a sawi bawk.

Lalhriatrenga Chhangte hian, Kolkata New Town AI-178 hmuna Lal Thanhawla ram chu West Bengal sorkara Addl. District Sub-Registrar, Rajarhat, District North 24-Parganas-a chhiah a pek aṭangin market value Rs. 22,21,92,532 a nih thu te, 2013 election affidavit-ah Lal Thanhawla'n assets a neih zinga a ziah lan loh thute a lo sawi tawh ṭhin a ni.

Lalhriatrenga Chhangte hian Lal Thanhawla hi Election affidavit-ah a kum zat a dik loa ziakah puhin, thubuai a theh­lut bawk a; chu thubuai erawh chu complaint thehluh hun limitation period (kum khat chhung) a pelh tawh avangin Court chuan ngaihtuah zui zel tlak loah ngaiin May 25, 2018 khan a lo hnâwl tawh thung.

Lalhriatrenga tarlan danin, Lal Thanhawla'n 2003 Assembly General Election affidavit-ah kum 57 mi niin a inziak a, 2008 Assembly Election affidavit-ah kum 68 niin a inziak a, 2013 Election affidavit-ah kum 71 angin a inziak a ni.