Indian Forest Amendment Bill EFCC buatsaihin sawiho a ni
Environment, Forest & Climate Change (EFCC) department bultumin nimin khan Secretariat conference hall-ah Mizoram tana 'Indian Forest Amendment Bill, 2019' him lohnate tlawmngai pawl, political party, kohhran hruaitute leh sorkar official-te'n an sawiho.
Sawihona kaihruaitu EFCC minister TJ Lalnuntluanga chuan, Indian Forest Amendment Bill, 2019-ah Mizoram zímte himna tur ngaihtuah a ṭul thu sawiin, "Kan thuneihna ṭhin kan chàn theihna turte pawh a awm ve thei. Kan ram himna tur, kan hnam himna tur atan Bill hian engtin nge min khawih, engtin nge kan ṭan rual ang tih sawiho a ngai a ni," a ti.
TJ Lalnuntluanga chuan, kum 1972-ah Indian Forest Act a pian thu sawiin, "He Act hian Mizoram min huam lo. Kum 1954-ah Mizoram Forest Act a hranin kan nei. Kum 1976-ah 42nd Amendment-ah Forest hi concurrent list-ah dah a ni a, tuna Bill duan tharah hi chuan Union List-a awmtir tumna a awmin a lang," a ti a; Bill duan tharah chuan Mizote'n thuneihna an neih laksak tumna a awm nual thu a sawi.
Sawihonaa tel pawl, party leh kohhran hruaitute chuan, Indian Forest Amendment Bill, 2019-a ṭha lo an tihte an sawi a; chu'ngte chu EFCC department-in chhinchhiahin, meeting-a telte an thawn leh hnuah ṭha an tih tlân chuan sorkar laipuiah thawn a ni ang. Sorkar laipui chuan Indian Forest Amendment Bill, 2019 chungchang hi sawihoa rawtna leh ṭha tih loh lai an neihte thehlut turin state hrang hrangte a hriattir a ni.