Vawiinah Aizawlah Amit Shah
Union Home minister Amit Shah, sorkar laipuia thuneihna chang mek BJP president ni bawk chuan vawiin hian Mizoram a rawn tlawh dawn a, chhun dar 12:35-ah Mizo High School Field-ah North East Handloom & Handicraft Exhibition a hawng ang.
Ruahman dan chuan, Amit Shah hian chhun dar 11:45-ah Lengpui Airport thlengin, chhun dar 12:05-ah Ṭhuampui Helipad a thleng dawn a, Raj Bhavan-ah a innghat phawt dawn a ni. Chhun dar 12:35-ah Mizo H/S Field-a NE Handloom & Handicraft Exhibition a hawn hnuah, chawhnu dar 2:00 - 3:30 chhung Raj Bhavan-ah Chief Minister leh NGO hruaitute a kâwm dawn a; haw turin chawhnu dar 3:30-ah Raj Bhavan a chhuansan dawn a ni.
Home Minister a lo kal dawn avang hian zing dar 6 aṭanga tlai dar 4:30 inkarah Aizawl khawpuia lirthei chêt vel dan tihdanglam a ni dawn a; Ṭhuampui pengṭhuam aṭanga Raj Bhavan inkar, Bawngkawn, Chaltlang, Chanmari, Zarkawt (Mizo H/S Field panna kawngpui telin), Dawrpui, Zodin Square, Treasury Square kawngpui sirah lirthei dah (park) phal a ni lo.
Rokhawlhna vanga helicopter hmanga Ṭhuampui a pan thei lo a nih a, NH-54 kawngpuia Aizawl a pan dawn a nih chuan, Lengpui - Raj Bhavan via Hunthar, Vaivakawn, Dinthar, Tuikual, Temple Square, Tennis Court kawngpui sirah lirthei dah phal a ni lo ang. In sakna bungrua leh thil dang, kawngpui tihnawk thei chi reng reng kawngpui kama dah phal a ni lo bawk.
Traffic SP chuan, Union Home Minister India rama mi pawimawh bik a nih angin, danin a phût anga zalen taka a chêt vel theihna tura lirthei tlân dan leh hûn (park) dan tihdanglam chu hrethiam turin mipui a ngen. A chunga kawngpui sawiahte hian vawiin zing dar 9 aṭanga chawhnu dar 4:30 inkarah dan pangngai anga lirthei tlân theih loh cháng a awm dawn a, hrethiam turin mipui a ngen bawk a ni.
Vawiin bikah chuan Chanmari, Hrangbana College leh Mizo H/S Field inkara chawhmeh zuar ṭhinte pawh zing dar 9 thleng bak inzawrh theih a ni dawn lo tih tarlan a ni bawk.
Amit Shah-a hun hman dan tur
• Dar 11:45 a.m. ah Lengpui Airport a thleng ang.
• Helicopter-in dar 12:05 p.m. ah Ṭhuampui Helipad a thleng ang.
• Dar 12:25 p.m. ah Raj Bhavan a thleng dawn.
• Dar 12:35 p.m. ah Mizo H/S Field-ah exhibition a hawng ang.
• Dar 1:30 p.m. ah Raj Bhavan a thleng leh dawn.
• Dar 2:00 - 3:30 p.m. chhung Raj Bhavan-ah Chief Minister leh NGO hruaitute a kâwm ang.
• Haw turin dar 3:30 p.m. ah Raj Bhavan a chhuansan dawn.