Min tihhmingchhiat tum ṭhin mah se, thiam ka chang leh ṭhin - Lal Thanhawla

Mizoram Pradesh Congress Committee (MPCC) president Lal Thanhawla chuan, chief minister, pastor leh mithiam intite'n amah chu tihhmingchhiat tuma an beih thu sawiin, "A tàwpah chuan thiam ka chang leh nge nge ṭhin," a ti.

Lal Thanhawla hian nimin khan Congress Bhavan-a inkhawmah thu sawiin, Rev.Dr Zairema (L) leh Bualhranga ten eirûk chungchangah thubuai an thehluh khum tawh thu sawiin, "An thubuai thehluh hi Supreme Court chuan ngaihtuah tlakah a ngai lo. An thehlut leh a, a thehluttute hi prominent citizen an nih avangin Supreme Court chuan state sorkar ngaihtuah turin a thawn a ni," a ti.

Thubuai thehluh a nih laiin Chief Minister a nih avangin police thuneitute uluk taka chhui tura a hriattir thu sawiin Lal Thanhawla chuan, "Min chhuitute'n appointment min dil a, mahse, police-in an mi chhuite appointment an dil ngai loh avangin an duh hun huna min ko turin ka ti a, police station-ah min ko a ni," a ti a; Supreme Court chuan CM-in police station-a a inkohtir tih an hriatin mak an tih thu a sawi.

MPCC President chuan, MNF-in sorkarna an chan leh veleh a thubuai chu chief minister Zoramthanga'n a tharthawh leh tih sawiin, "Min chhui tur an ruat a, thuhretu pawh 40 lai an nei. Mahse, thuhretute pawh min ṭan lo zawngin thu an sawi lo. Thuhretu ka neih ve loh chhan judge-in min zawt a, neih ngai ka tih loh thuin ka chháng. A tawpah chuan thiam ka chang a ni," a ti.

Lalhriatrenga Chhangte-in tun hnaiah a khin leh thu sawiin Lal Thanhawla chuan, "Thiam ka chang leh bawk. Amah leh a bula ṭhu Kapliana Pachuau-in Court thutlukna Court chhung aṭangin dik tâwk loin an thehdarh a, Contempt of Court kalpui tum a niin ka hria. Gauhati High Court thlenga thubuai hi kalpui tum a ni," a ti a; Court thutlukna chu duh anga her danglam ngawt chi a nih loh thu a sawi.

Congress party President chuan, MNF-te chu zalenna sual tak tak loah a puh nawn a, "Zalenna sual tak tak ila chuan tuar pawh ni ila a zia deuh ang. Zalenna sual miah lo leh sual tum miah loin kum 20 chhung kan buai a ni," a ti.

Serampore College (University)-in Doctor of Divinity pek an tum chungchangah Lal Thanhawla chuan, "Phû lo hle mah ila pawm loh chi a ni lo a, inthlahrung tak chungin ka pawmna lehkha ka thawn lêt tawh," a ti a; DD a dawn tur chu amah ṭawngṭaipui ṭhintu Mizoram mipui vang a nih thu sawiin, ṭawngṭaipui zel turin mipui a ngen a ni.