Tih tak zeta ramri chinfel tum awm chhun PC sorkar - MPC President

Mizoram Peoples' Conference (MPC) president Lalhmangaiha Sailo chuan, Mizoram leh Assam ramri chungchang chu Mizote'n an vei tlang hlein lang mah se, Mizorama sorkarna siam tawh zingah PC (MPC hming hmasa) party sorkar chauhin tih tak zeta chinfel tumin a bei niin a sawi.

Lalhmangaiha Sailo chuan, kum 1978-1984 chhunga Brig. T Sailo kaihhruai PC party an sorkar laiin ramri buai an vei hle tih sawiin, "Chinfel ngei tumin Brig. Vankunga (L) kaihhruai Boundary Committee an din a, document pawimawhte dap chhuakin, ramri lung 46 phunnate enfiahin theihtawpin hma an la a, Prime Minister hnenah memorandum thehlutin, theihtawp tak meuhin Delhi-ah ûm zui a ni," a ti.

PC sorkar hun lai chu India sorkar leh MNF-te inbiakna neih lai a nih avangin, inremna (settlement)-ah pawh ramri chu chingfel tel ngei turin an ngen tih sawiin Lalhmangaiha chuan, "Assam sorkar lam ngawrh takin an bia a ni. Assam lam hian ṭan fung ṭha an neih loh avangin chinfel mai theih dinhmunah ramri thu hi a ding hman tawh a ni," a ti a; ram humhalh tuma PC sorkar hmalakna chu MNF huat zawng tak a nih thu a sawi.

MPC President chuan, MNF-te'n RTB order tichhuakin, 'PC hruaitute zawng zawng an bàn loh chuan kah hlum vek tur,' tiin thuchhuah an siam tih a sawi a, "Ramri chinfel chu MNF-te salu rawn hawn tur a ni a, lo inrawlh tawh suh u, tia PC sorkar an hriattir avang leh PC MLA leh hruaitu ṭhenkhatte kah hlum an nih tâk avangin, ramri chungchang hmalakna chu chawlhsan a ni ta a ni," a ti.

Lalhmangaiha Sailo chuan, inter state boundary chingfel tur chuan buaina nei state-te dawhkân kîl hoa an inbiak a ṭul thu sawiin, "Inbiakna thlentir tur chuan Central-in Boundary Commission dinin, Mizoram leh Assam-te inbiakna a siam thei a ni," a ti a; Boundary Commission din turin state sorkar chu rang taka hma la tura an phût thu a sawi.