ZPM MLA-te uire luihtir tumin MNF-in an nawr - ZPM Secy. General

Zoram Peoples' Movement (ZPM) secre­tary general K Sapdanga chuan nimin khan ZPM party pisaah thu a sawi a, "ZPM MLA-te uirè luihtir tumin MNF-in an nawr a ni," a ti.

K Sapdanga chuan, sorkar thar a pian khan ZPM MLA pasarihte chuan Assembly-ah ZPM Legislature Party (ZLP) an din thu sawiin, "Assembly Speaker chuan January 3, 2019 khan a pawmsak. Election Commission of India (ECI) chuan ZPM chu political party-ah a pawm ta a, ZPM-a tel pawl hrang hrangte pawhin an pawl ṭhiatin pawl pakhata luanho an rêl a ni," a ti a; ZPM chu eptu zinga MLA ngah ber an ni leh an ṭhangduang chu rorellai party-in an ngaimawh tih a sawi.

MNF-te chu ZPM leh an MLA-te tihbuai dan kawng dapah puhin ZPM Secy General chuan, "Inthlan lai khan ZPM hian political registration a la neih loh avangin ZPM aiawhte independent candidate an nih a ngai a. Chu chu remchangah lain, ZPM MLA-te chu anmahni thlang tlingtu ZPM aṭanga inla hrang turin September 18, 2019 khan thupek siam a ni a, ZLP pawmna pawh sût a ni ta a ni. ZPM MLA-te chu anmahni thlang tlingtu party-a tel ve loa uire san tura nawr luih an ni," a ti.

K Sapdanga chuan, Assembly Speaker chuan a thil tihte chu hreh tak chungin, nawr luihna vanga a tih a ngai nia an rin thu sawiin, "Mizoram state Assembly inthlan hmasa ber kum 1987 khan MNF-in registration an la nei lo a, MNF hminga MLA atana thlan tlin mi 24-te chu independent MLA vek an ni a, sorkarna an siam. MNF leh an MLA-te chu tihhran tumin eptu party tumahin an bei lo," a ti a; kum 1989, 1993 leh 1998 inthlanah pawh party-in registration an neih loh avanga independent-a ding MLA-a tlingte chu an party hminga MLA an nih tluan thu a sawi bawk.

ZPM MLA-te anmahni thlang tlingtu party mipui laka uire tuma sorkar ber a buai chiam chu vanduaithlak an tih thu sawiin Sapdanga chuan, "Ram hruaitu hmasate tih duh ngai hauh loh a ni. Rorel lai party-te pawh an rilru inlam lêt a, an thawhpui MLA ve thote tihbuai phêt an tum hi bànsan tawh turin kan ngen a ni. Mizoram mipuite'n an duh ang tak sorkar kalphung thar an neih theihna turin ZPM chuan theihtawp a chhuah mek a, kalphung thar beihpui thlakin khaw tin fan chhuah kan tum a ni," a ti.

K Sapdanga chuan, ZPM-in sorkarna a siam chuan roreltu chauh ni lo, rawngbawltu sorkar, mipui tan sakhaw zalenna humhimtu sorkar, ramri buai chingfel tura hma hruaitu sorkar leh Chakma foreigner-te chunga dan lek ngam sorkar din a nih dawn thu a sawi bawk.