KHAWTHLIR

Union Home minister Amit Shah chu vawiin hian Aizawlah a rawn kal dawn avangin venhimna ṭha taka kalpui a ni dawn a, Aizawl district Sub-Divisional Magistrate chuan Cr.PC Section 144 hmanga thupek chhuahin, vawiinah Aizawl khawpui huam chinah remote control hmang drone/aerial camera lam chi reng reng thlawhtir khap a nih thu a puang.

State Election Commission-in November 5, 2019-ah Sinlung Hills Council inthlanpui a buatsaih dawn avangin, tluang leh ralmuang taka inthlan a nih theih nan Aizawl District Magistrate chuan Cr.PC Section 144 tlawhchhanin thupek a chhuah a, "October 11, 2019 (Zirtawp­ni) ral hma ngeiin SHC huam chhunga silai nei zawng zawngin an hnaih ber police station/outpost/battalion outpost-ah silai an dah lut vek tur a ni," a ti.

Pachhunga University College-a Department of Psychology leh Light for Comprehensive Development (LiFCoDe) chuan Mizoram Social Defence and Rehabilitation Board (Regional Resource Training Centre NE-III) bultumin nimin khan PUC-ah ‘Awareness and sensitization programme on substance abuse’ tih hun an hmang a, zirtirtute leh zirlai 300 vel an tel. Zirlaite chu ruihhlo hman sual chungchanga Mizoram dinhmun hriattir an ni a, humsual dai lo tur leh ruihhlo laka fihlim tura fuih an ni.

Mizoram Finance & Accounts Service Association (MAFASA) chuan nimin khan State Guest House conference hall-ah inkhawmpui vawi 25-na an hmang a, Finance commissioner & secretary Vanlal Chhuanga khuallian a ni. Khuallian chuan, khawi service-ah pawh mahni hna ṭha taka thawk apiangte sorkar tana chhawrnahawm, mipui tana malsawmna an nih thu sawiin, MAFASA member-te chu sorkar sum vawn, hman leh chinfel hna thawktu an nih angin, fimkhur zual bik turin a chah. MAFASA sanction post 90 zinga 27 a ruak mek tih an tarlang.