November 5-a SHC inthlan turah SEC-in notification a tichhuak
State Election Commission (SEC) chuan Sinlung Hills Council (SHC) inthlanpui neih hun tur November 11, 2019 a nih thu a puang a, inthlan hun tur October 1, 2019-a a puan hnuah, SHC election atan hian October 3, 2019 khan notification a tichhuak. October 1 aṭang khan SHC huam chhunga Election Model Code of Conduct hman ṭan a ni.
SEC-in notification a chhuah dan chuan, SHC inthlanpuia chuh tumte tan October 10 tlai dar 3 thleng nomination paper thehluh theih a ni a, nomination-te chu October 11 chawhnu dar 3-ah endik tur niin, inhnûkdâwk duhte tan October 14 tlai dar 3 thleng hun hawn a ni ang. October 14 tlai dar 3 hnuah candidate-te symbol pek an ni ang a, inthlan chuh turte hming pawh târ chhuah nghal tur a ni.
November 5, 2019 zing dar 7 aṭanga tlai dar 4 inkarah vote thlak tur a ni a, vote thlak zawh velah ballot box zawng zawng constituency headquarters panpui nghal tur a ni. Inthlan ṭhat (re-poll) ngai a awm chuan November 7-ah vote thlak ṭhat tur a ni a, re-poll ní-ah vote tlate constituency headquarters panpui nghal tur niin, constituency headquarters-a ballot box a thlen kim hnuah vote chhiar a ni ang.
SHC-ah hian constituency 12 a awm a, chu'ngte chu - Khawlian, Phuaibuang, Suangpuilàwn, Vànbâwng, Ratû, New Vervek, Sakawrdai North, Sakawrdai South, Zohmun, Ṭinghmun, Sáipùm leh Saiphai-te a ni. Bial 12-ah hian polling station 38 a awm a, polling station zinga 31 chu Aizawl district-a mi a ni a, Kolasib district-ah polling station pasarih a awm thung.
SHC inthlana hman tur electoral roll chu September 30, 2019 khan tihchhuah a ni tawh a; SHC chhungah vote 20,914 awmin, mipa 10,509 leh hmeichhia 10,405 an ni. Inthlan atan Mizoram sorkara officer 24 chu returning officer (RO) leh assistant returning officer (ARO) atan ruat an ni a, election observer atan senior officer pathum ruat an ni bawk.
Candidate-te chu campaign atana sum hman ral ni tina chhinchhiah tur leh inthlanna result puan aṭanga ni 30 chhungin an sum hman dan report thehlut tura tih an ni dawn a; candidate-te’n campaign atana sum an hman theih zat chu constituency pakhatah Rs. 2,00,000 a ni.