Hawla beih tum hrim hrim ka ni lo - Lalhriatrenga Chhangte

Kum 2013-a Mizoram Assembly inthlanpuia affidavit dik lo thehluh chungchanga chief minister hlui Lal Thanhawla khingtu Lalhriatrenga Chhangte chuan, Lal Thanhawla beih tum hrim hrim a nih loh thu a sawi.

Lalhriatrenga Chhangte chuan nimin khan Aizawl Press Club-ah thuthar thehdarhtute a kâwm a; false affidavit case chu Lal Thanhawla bik zîm tâwt tumna a ni lo tih sawiin, "Ka tum lâwk em em emaw, amah Pu Hawla beih tum ve hrim hrima buaipui ka ni lo. May 1, 2017 khan ka hnathawhna avangin Kolkata-ah transfer ka ni a, Pu Hawla'n Kolkata-a in a sak mek thu sawi awm chu ka zawtfiah a ni," a ti.

Lal Thanhawla in sak chu a ngaihtuah chhunzawm loh thu sawiin Lalhriatrenga chuan, "November 3, 2017 khan Mizoram House, Kolkata-a ka kal remchan lai takin House awmna lai vel chu kan CM-in in a sakna lai vela an sawi a ni tih chu ka hre chhuak leh ta chauh a ni," a ti a; November 3, 2017 aṭangin Pu Hawla ram neih chungchang chu zir chiang chho zelin, tun hi a thleng ta niin a sawi.

Lalhriatrenga Chhangte chuan, Court order copy aṭanga a lan dan chuan, complaint an thehluh ang ngeiin Lal Thanhawla'n Kolkata-a ram neih chu affidavit-ah a ziah tel loh ngei thu a sawi a, "Chuvangin, ka puhna bulpui ber Pu Hawla hian false affidavit kan tih tak mai chu a lo thehlut a ni tih chu Court pawhin min pawmsak a ni," a ti.

Lal Thanhawla chuan thiam chang lo siin hrem lohin Court-in a chhuah tih mipuiin hria se a duh thu sawiin Lalhriatrenga chuan, "India ram Criminal Procedure-ah Court a fimkhur em em a ni. Thil ti sual lo pakhat lek pawh dik lo taka hrem palh a hlauh êm avangin, chutiang thil a thlen ai chuan misual 99 chhuah zalen mai pawh a pawi ti lo ṭhin," a ti a; Hawla chu misual 99 chhuah zalen tak rih zingah a chhiar tel thu a sawi.