MCON-in zirlai thlahna leh lawmna hmang

Mizoram College of Nursing (MCON) chuan October 3, Ningani chawhnu khan B.Sc. (Nursing) zir chhuakte thlahna Graduation vawi 32-na leh zirlai thar (batch 15-na)-te thutiam lakna Lamp Light­ing Ceremony vawi 11-na an buatsaih a, Health & Family Welfare minister Dr R Lalthangliana'n a hmanpui.

Dr R Lalthangliana chuan, B.Sc. (Nursing) zir zo mi 30-te chu duhsakna hlanin, Mizoram páwn lamah pawh hna thawka chhuak ngam tur leh chona hmachhawn turin a fuih a; Mizo nurse-te'n ram chhung damdawi-in lianahte hriat an hlawh thu a sawi.

B.Sc. (Nursing) zir thar turte pawh fuihin R Lalthangliana chuan, "Nurse zir tura in thutiamte hre reng a, Pathianin mawhphurna lian tak a pek che u hi ṭha takin, a taka lantir turin kan duh che u," a ti a; nurse hna chu damlo enkawl leh bawihsâwm a nih avangin Isua hnathawh chhunzawmtute an nih thu sawiin, "Hmangaihna leh duhsakna lantir a, Isua tihdam rawngbawlna a taka lantirtu in ni tih theihngilh loh a ṭha a, hawihhâwmna nena ṭawngkam uluk pawh a ngai a ni," a ti.

Health Minister chuan, sub-centre zawng zawng chu Health & Wellness Centre-ah hlankai tum a nih thu leh kumin chhungin sub-centre 40 hlankai tum a nih thu te, Health department-a thawktu post ruak leh mamawhte hnawhkhah phalna sorkarin a bik taka a pek thu te, Zoram Medical College tihchangtlun nan post eng emaw zat lak phalna sorkarin a pek thu te, MCON panna kawng chu cheng nuai 18 sêngin thawh vat a nih tur thute a sawi bawk.

B.Sc. (Nursing) zo tharte hnenah Hospital & Medical Education director Dr Lalhmangaihi'n lawmpuina a hlàn a; State Referral Hospital nursing superintendent K Lalbiaknguri kaihhruaiin B.Sc. (Nursing) zir tharte'n bati chhiin thutiam an chham rual a ni.

MCON principal Lalchhanhimi sawi danin, MCON hi kum 1980-ah Nursing School, Civil Hospital, Aizawl tiin din a ni a, kum 2005-ah college-a hlankai niin, Mizoram College of Nursing tih a ni. A tir lamah chuan General Nursing & Midwifery (GNM) zirna a ni a, college-a hlânkai a nih hnuah B.Sc. (Nursing) zirna hawn a ni a, mi 320-in B.Sc. an zir chhuak tawh.