Wildlife Week vawi 65-na hman a ni

Nimin khan Assembly Annexe conference hall-ah Environment, Forest and Climate Change (EFCC) department huaihawtin Wildlife Week vawi 65-na hman a ni a, EFCC minister TJ Lalnuntluanga'n a hawng.

Hawnna inkhawm hi PCCF Ch M Rao-in a kaihruai a; TJ Lalnuntluanga chuan, "Kum 65 chhung hian nungchate hlutzia leh mihringte tana an hlutziate inzirtir nan kan hmang ṭhin. Mizote hi kan nunphung leh ziarángah hian sa kâp thei leh thangchhuah pa kan ngaisang ṭhin a, chu environment aṭanga seilian kan nih avangin Wildlife Week hi Mizote tan a pawimawh bik hle a ni," a ti a; nungcha humhalh kawngah inzirtir nasat a la ngaih thu a sawi.

EFCC Minister chuan, Kristian nihna angin nungcha leh ramngaw humhalh a pawimawh thu sawiin, "Forest department-te'n nungcha humhalh lamah hma an la a, beidawn cháng a awm ṭhin. Nungchate humhalh duh pawl tam tak lo chhuakin hma an la a, silaia kah aiah thlalakna hmanga 'shot' zawngin ṭan an rawn la a, hei hian ṭhangtharteah zirtirna thui tak a pe a ni," a ti.

TJ Lalnuntluanga chuan, ramsate avanga ramtuileilo leh harsatna tâwkte tan EFCC department-in kum khatah zangnadawmna cheng nuai 15-16 vel a sên ṭhin thu a sawi bawk. Wildlife Week hmannaah hian EFCC secretary Ajay Saxena chu khual­zahawm a ni a; Mizoram University Zoology department aṭangin Dr HT Lalremsanga'n Mizorama nungchate chanchin leh pawimawhnate a sawi a ni.