Káwlhâwk thlawhhmaah rannung puang

Lunglei district khawthlang lam, Káwlhâwk khuaa thlawh­hmaah rannung a puang a, buh leh thlai dang an ei chhe nasa a, chu'ngte chu October 3, Ningani kan Lungleia Agriculture department-a thawkte'n a hmunah an enfiah. Loneitute chuan, ran­nungte chu tun kar aṭanga puang ṭan an nih thu leh buh leh thlai dang an bawm nasat thu an sawi.

Rannung puang enfiahtu Lunglei district agriculture officer Tlangtimawia Zote leh officer-te bakah thawktu dangte chu hmun thumah inṭhenin Kawlhâwk khaw thlawhhmate an enfiah a; rannungte chu Mizoramah an la hmuh ngai loh thu leh, beetle chi khat, soldier beetle a an teuh ber thu an sawi a ni. 

Agriculture department-a thawkte chuan rannung thlalakte chu Hyderabad-a Agriculture hmunpuiah an thawn nghal a; laboratory-a endiktute chuan result thawn nghalin, rannungte chu thlai ei chhe chi an nih loh thu leh ngaimawhawm an nih loh thu an rawn hriattir a ni.

Rannungte hian loa chêt vel leh hnathawh an tihharsat avangin hnawhdarh dan tur ngaihtuah nghal a ni a; Agriculture department-a thawktute chuan a kahna hmanrua sprayer leh organic rannung thahna pein an kâp nghal bawk.