C Lalrinsanga'n JICA mithiamte a kâwm

Agriculture minister C Lal­rinsanga chuan nimin khan a chenna banglaah Japan Interna­tional Cooperation Agency (JICA) mithiamte a kâwm a,  Mizorama JICA project kalpui dan leh hma­lakna kalpui zel dan tur a sawipui.

C Lalrinsanga chuan, chawa Mizoram a intodelh theihna tura an mamawh chu technology lama hmasawnna a nih thu sawiin, "A rahbi ber chher rem a nih chuan sum tam tak séng lo pawhin hma a sawn theih a, chumi atana Japan mithiamte nena thawhhona duhawm tak neih a ni tur hi a lawmawm hle," a ti a, thawhhona ṭha leh inpekna dik neih chhunzawm zel a pawimawh thu a sawi.

Agriculture Minister chuan, Mizorama ni tin ei leh bar ma­mawh hrang hrang lei nan sum tam tak theh chhuah ṭhin a nih thu sawiin, "Ram danga theh chhuak tawh loa keimahni thar ngei kan ei theihna atan Japan mithiamte nena ṭanhona hian rah ṭha tak a chhuah zel ang," a ti.

JICA leh Mizoram sorkar thawhhona hi technical project cooperation sector-ah a ni a, project chu 'The project on Capacity Enhancement for Sustainable Agriculture and Irrigation Deve­lopment in Mizoram' tih a ni. Sorkar depart­ment pali - Irrigation & Water Resources, Agriculture, Horticulture leh Land Resources Soil and Water Conservation department-te'n an kalpui a ni.

JICA project hnuaiah hian pilot village paliah Minor Irrigation project pali, cheng nuai 192.90 sênga thawh mek a ni a, contract work 35% leh community contract 80% thawh zawh a ni tawh.

Mizorama hmalakna tur RD block pali - Bilkhawthlir, Aibawk, Serchhip leh Champhai-te thlan a ni a; kum 2020-21 ṭanga ṭan tur second pilot project atan inbuatsaih leh mek niin, khaw pathum - Bilkhawthlir N, Làmchhip leh Tlangsamte pilot village atan thlan a ni.

Japan aṭanga lo kal JICA hotute hi senior technical advisor Narihide Nagayo-a'n a ho.