Phurrit zawngin chhiah tihsan tum a ni lo - CM Chhiah a pung dawn tih a lang - Zodintluanga

Chief minister Zoramthanga chuan, mipui phurrit siam zawnga chhiah tihsan an tum loh thu a sawi. Hetih lai hian, Congress Legislature Party (CLP) leader Zodintluanga chuan, Chief Minister thusawi aṭangin mipui aṭanga chhiah lâk a pung dawn tih a lan thu a sawi thung.

Assembly session-a budget a pharh hnuah Finance enkawltu CM Zoramthanga chuan Assembly Annexe conference hall-ah thuthar thehdarhtute a kâwm a; budget tharah Mizoram thawh chhuah tura beisei pung mah se, mipui phurrit siam zâwnga chhiah lâk tihpun an tum loh thu sawiin, "Tlema tihpun deuh hret ngai chu a awm thei. Kan innghahna ber zawk chu, khawn dan a ṭhat tawk loh vanga chhiah hmuh loh a tam em em a, ṭha taka khawn kan tum. Khawn dan a ṭhat loh avangin pe duh reng mah se, mipuiin an pek loh phah ṭhin," a ti.

Zoramthanga chuan, chhiah lâk tam ringawt a, mipui thawhchhuah tihtam a nih si loh chuan mipui tan phurrit a nih thu sawiin, "SEDP hi nuai bî lak luh theihna tur a ni. NLUP anga sem tawp chu hnathawk tur chaw funsakna a ni a, an la a, a ral mai. Keini chuan khatin kan ti dawn lo. Chaw pawh kan funsak ang a, an lo tur te, kalkawngte kan buatsaihsak a ni. Engamah hmaa neih zawng zawng chaw fûnna atana hman zawh vek a, hna thawh tur ngaihtuah si loh a ṭha lo," a ti. Chutih rualin, SEDP-ah hian sum fai pek tur pawh tlém a awm tur thu a sawi.

Budget pharh tâk chu an besei ang ni chiah lo lai a awm thu sawiin Chief Minister chuan, "Central-a pawisa dawn tura rin ang a phâk chiah lo a, beisei aiin a hniam. Nikum aiin a total a tam a, beisei ang erawh a ni pha lo. Chutihrualin, central-in state-te hmuh theih vek tur cheng vbc. 15,000 vel a dah a, kan theih anga tam thàl kan tum dawn. Kan resource neih ang ang hi thiam taka kan hman a ngai dawn. Hemi kawnga hmalakna pakhat kan tih mek chu Mizoram Vehicle Outsourcing Policy, 2019 a ni," a ti.

Chief Minister sawi danin, a pharh tak budget chu project base budget a ni. Tun hma angin department-ah pawisa dah vak vak a ni dawn loa, an mamawh zualpui erawh dah a ni ang. Department-te'n project an siam ang a, a doletna tur pek ṭhin an ni dawn.

CLP leader Zodintluanga pawhin nimin khan Congress Bhavan-ah thuthar thehdarhtute a kâwm a; Chief Minister budget speech aṭanga a hmuh dan sawiin, "Kan ramin mipui aṭanga chhiah lâk tihpun leh mipui hrêk a hmachhawn dawn," tiin a sawi.

Zodintluanga chuan, "CM-in fiscal deficit a pun thu a sawi a. Mak deuh chu fiscal deficit a pun laiin, state-in income resource kan neih a hma aia a pun thu a sawi bawk si," a ti a; CM thusawi chuan Mizoramin financial management-ah kal ngaihna a hriat lohzia a tihlan thu a sawi a ni. 

Congress sorkar financial management-ah a ṭhatzia CM-in a sawi chhuak nia sawiin Zodintluanga chuan, "House meuha a sawi hi a lawmawm hle. 15th Finance Commission-in kum nga kal taa sorkarin sum dinhmun a siamṭhatzia a rawn sawi khan financial management lama Congress ṭhatzia a tilang a ni," a ti.

SEDP chungchang sawiin CLP Leader chuan, "An flagship programme SEDP-ah nikumah cheng vbc. 750 an dah laiin, kuminah chuan cheng vbc. 500 vel chiah an dah a, hei hian inthlan hmaa MNF President-in a sawi anga chhungkaw tina Rs. 3,00,000 an sem tur thu a sawi kha a tak ram a thlen dawn lohzia a tilang. Kan budget hi a ṭha lo hle a, chhiah lak an tipung tur hi a pawi hle a ni," a ti. CM Zoramthanga'n a sawi ṭhin - 'A khawnpui' chu tun budget-ah a awm ta lo em ni tih chu mipui zawhna a nih tur thu a sawi bawk.