KHAWTHLIR

Vawiin, February 20 hi Mizoram State Day a ni a, Mizoram hmun hrang hrangah hman a ni ang. Mizoram sorkar chuan State Day hi district tinah hmang turin a hriattir a, Aizawlah chuan Governor leh Chief Minister hoin Vanapa Hall-ah hman a ni ang a, chawhma dar 11-ah ṭan a ni ang. State Day pual inkhawmah hian Mizoram sorkara gazetted officer zawng zawng tel vek tura hriattir an ni.

Synod Executive Committee (SEC) nimina Synod Office-a ṭhukhawm chuan kum 2020-2022 chhunga Central KṬP leader atan Rev. Vanlalmuanpuia Khiangte, Bawngkawn Bethel Bial vawngtu pastor a ruat a; CKṬP general secretary atan T. Upa Rochungnunga a ruat nawn bawk.

Kawng siamtha

February 19, 2020 a­ṭang­in PWD-in Bilkhawthlir leh North Chawnpui inkar kawng, Chepte lei aṭanga N. Chawnpui thleng siam hna an thawk dawn a, hei vang hian Kolasib SP chuan he kawngah hian lirthei tlân theih a ni rih lo tih a puang. Millennium Centre bul aṭanga Babutlang panna kawngpui pawh nimin khan siamṭhat hna thawh ṭan a ni a, March 4, 2020 thleng thawh a ni dawn a; hna tibuai thei turin kawng sirah lirthei leh bungrua dah phal a nih loh thu Traffic SP Rodingliana Chawngthu-in a tarlang.

Kolasib DC Sangchhin Chinzah chuan thupek chhuahin, Kolasib district-ah ram dang, state páwn leh district dang aṭanga vawk lak luh khap a nih thu a puang. Animal Husbandry & Veterinary Director hnen aṭanga phalna nei tan erawh chuan lak luh theih a ni. Vawk damlo leh thi reng reng chu mihring tana hlauhawm lo tura phûm vek tur a nih thu tarlang a ni bawk.

Mizoram Bru Returnee Peace Accord Implementing Demand Committee (MBRPAIDC) leh Bru Welfare Association, Mizoram (BWAM) hruaitute chuan tun hnai khan chief minister Zoramthanga an hmu a; Mizoram sorkar leh BNLF inremna thuthlung an sawipui. CM-in ṭha taka a lo dawnsawn avang leh sorkar laipuiah hma lakpui a tum thu a sawi avangin an lawm hle tih an tarlang.