AMC inthlan hun February 16, 2021
State Election Commission (SEC) chuan Aizawl Municipal Corporation (AMC) inthlan hun atan February 16, 2021 an ruat. Zing dar 7 aṭanga tlai dar 4 inkarah vote thlak theih a ni dawn a, February 18-ah vote chhiar a ni ang. SEC chuan nimin khan inthlan hun hi an puang.
State election commissioner (SEC) Laima Chozah chuan nimin chawhnu khan a pisaah thuthar thehdarhtute kâwmin AMC inthlan hun a puang a; AMC term hnuhnung ber chu December 12, 2020-ah a tàwp a, chumi hmaa inthlan buatsaih tur a nih thu sawiin, "Covid-19 avangin a hunah inthlan buatsaih theih a ni lo. Boruak ziaawm veleh electoral roll revision neih ṭan a ni a, boruak a ziaawm tawh hlein kan hria. Hripui kái pawh an tlem telh telh a ni," a ti.
Vote thlaktute'n him leh awlsam, hun khawhral lo zawka vote an thlak theihna tur leh voter-te hripui laka an him theihna turin AMC huam chhunga polling station awm sa 226 bakah 48 siam belh a nih thu sawiin SEC chuan, "Tun ṭum inthlanah hian EVM thar ber, VVPAT awmna ECI-in hman an phal lo a, EVM hman ngun ber ang hman a ni ang," a ti a; khaw thim hmaa vote thlak zawh theih an beisei thu a sawi.
Laima Chozah chuan, party worker-te inkara boruak ṭha lo pumpelh nan polling station bulah political party-te leh candidate-te awm khawm nan common election camp pakhat ṭheuh siam phal a nih thu a sawi a, "Camp hi a mâwlmang thei ang bera siam tur a ni a, flag, poster, symbol, etc. tàr phal a ni lo. Party tinte pawm tlàn theih tur tualchhung mi (NGO/MPF/LTF) duty tel tura beisei an ni," a ti.
Commissioner sawi danin, kum 2015 aṭanga AMC councillor term kum 5 chu chhunzawm zel tur a ni a, AMC term thar pawh kum 5 a ni ang.
SEC secretary Teresy Vanlalhruaii chuan, Covid-19 kái an tlahniam deuh tawh a, vaccine pek ṭan a nih tawh bawk avangin state sorkar nen inráwnin inthlan buatsaih tura hma an lâk ṭan thu a sawi.
Inthlan hun puan a nih tâk avang hian AMC huam chhungah emaw, Aizawl kaihhnawih thilah chuan Election Model Code of Conduct kalpui nghal a ni.
AMC sorkar pahnihna chu December 12, 2020-ah a tàwp tawh a, term hi pawtsei loin, Mizoram sorkar chuan administrator atan AMC commissioner K Laldingliana ruat a, administrator hian a enkawl mek a ni.
AMC ward 19 zinga paruk - III, VIII, X, XIV, XVI leh XIX-te chu hmeichhe tana hauh (reserve) a ni a, a bâk zawng chu general ward a ni. Political party pathum - Congress, MNF leh ZPM-te'n an candidate tur an puang kim tawh a, BJP-in pariat an puang tawh.
Candidate puan tawh zingah AMC sorkar pahnihnaa hmeichhe councillor pahnih - B Lalawmpuii leh Zodinpuii te chu an ward-te hmeichhe tana hauh bik ni tawh lo mah se, tun ṭum inthlanah hian an ding leh dawn a ni.