COVID-19: Mizoram dinhmun Hripui vei mi 3 hmuh belh a ni
January 21, Ningani khan Mizoramah Covid-19 vei mi pathum hmuh chhuah a ni a, natna (symptom) lang chhuak pakhat a awm a, mi pahnih chu tualchhunga kái an ni. Nimin khan hripui laka fihlîm tawh mi paruk chhuahtir an ni thung.
Covid-19 vei Ningania hmuh chhuah mi pathumte chu ZMC laboratory-a hmuh pakhat leh RAT hmanga hmuh pahnih an ni a; TrueNAT-PCR hmangin dist. pakuaah swab sample endik ni mah se, hripui vei hmuh chhuah a ni lo.
Covid-19 laka fihlîm tawh mi paruk chu nimin khan chhuahtir an ni a; Lunglei Sazaikawn CCC aṭangin mi pahnih, ITI, Pushpak, Kolasib SIRD leh Khawzawl CCC aṭangin mi pakhat ṭheuh an chhuak a ni.
Mizorama Covid-19 vei hmuh chhuah tawh chu mi 4,349 an ni a, mipa 3,183 leh hmeichhia 1,166 an ni. Nimin tlai dar 5 thleng khan mi 4,282 (98.46%) chhuahtir an ni tawh a, mi pakua (0.21%) thi tawhin, enkawl mek mi 58 (1.33%) an awm.
January 21, Ningani khan Mizoramah swab sample 1,325 endik a ni a, ZMC laboratory-ah sample 87, TrueNAT-PCR hmangin district pakuaah sample 205 leh RAT hmangin district 10-ah sample 1,033 endik a ni. Covid-19 positive hmuh chhuah mi pathum chu sample endik zat aṭangin 0.15% a ni.
Sorkar thuchhuah tarlan danin, ZMC laboratory-a RT-PCR hmanga Covid-19 positive hmuh chhuah mi pakhat chu state páwn aṭanga tun hnaia haw a ni a; RAT hmanga hmuh chhuahte chu sikul naupang, sikul luh dawn vanga swab sample endiktir ve ve niin, hri an kàina hriat a ni lo.
January 21, 2021 thlenga Mizoramah swab sample endik tawh zat chu 1,99,000 a ni a, chu'ng aṭanga Covid-19 positive mi 4,349 chu 2.18% a ni. Hripui vei hmuh tawh zinga mi 2,055 chu Mizoram chhunga kái an ni a, mi 2,294 chu Mizoram páwn aṭanga an rawn luh hnua hmuh chhuah an ni.
ZMC-a hmuh chhuah:
Republic Veng - 1: Hmeichhia kum 23, West Bengal aṭanga haw, home quarantine lai, symptom nei lo.
RAT hmanga hmuhte:
Chawlhhmun - 1: Mipa kum 16, sikul luh dawn vanga sample endik, hri kàina hriat loh, symptom nei lo.
Siaha - 1: Hmeichhia kum 16, Aizawla hmuh chhuah; sikul luh dawn vanga sample endik, hri kàina hriat loh, symptom nei.