Pawl 10 leh 12-te'n sikul an lut ṭan

Covid-19 hripui léng vanga hun rei tak sikul khàr a nih hnuah Mizoram sorkar ruahman angin nimin khan sikul hawn ṭan a ni a, pawl 10 leh 12 zirlaite'n sikulah zirna an ṭan. Hetih lai hian, pawl 1-9 leh pawl 11 zirlaite chu sikul la kal lo tura tih a ni.

January 15, 2021-a Health & Family Welfare minister Dr R Lalthangliana hoa sorkar hotute'n Covid-19 Review Meeting an neih ṭumin January 22 aṭangin HSLC leh HSSLC exam tur pawl 10 leh 12 zirlaite sikul kal ṭan tura rèl a ni a; February 2021 aṭangin Pathianni leh Inrinni (sabbath) chhunah inkhawm ṭan theiha rêl a ni bawk.

Mizoram sorkar chuan HSLC leh HSSLC exam tur zirlaite tan sikul hawn an remtih rual hian, hostel pawh hawn ṭan nghal an remti a; chutih rualin, hostel-a lut turte chu Rapid Antigen Test (RAT) hmangin swab sample endik hmasak vek tura tih a ni. 

Vanglaini palai zawhna chháng­in School Education joint director Lalhmachhuana chuan, nimin khan sikul luh ṭan theih a nih angin sikul tam berah zirlaite'n zirna an ṭan nghal a, sikul lut tura harsatna nei an hriat rih loh thu a sawi.

Lalhmachhuana chuan, sikul hrang hrangah sikul awmna khua/venga mite chu kim takin sikul an kai thei a, khaw danga awmte zingah erawh chuan la kái ṭan thei lo an awm nual thu a sawi a, "Hostel-a lut turte RAT hmanga swab test hmasak vek tur a nih avangin kim taka sikul ṭan nghal a harsa rih," a ti. 

Hostel-a lut tur zirlaite chu an luh hmain swab test vek tur a nih avangin Mizoram sorkar chuan ruahmanna a siam a, Aizawl bikah chuan Bawngkawn leh Chawlhhmunah swab sample endikna tur siam belh a ni.

Lalhmachhuana chuan, January 21, Ningani khan School Education department hotute'n sikul hrang hrang an tlawh kual a, sikul lut ṭan tura an inbuatsaih dante an enfiah tih a sawi bawk. 

Hetih lai hian, hostel luh dawn vanga tun hnaia swab sample endiktir zirlai zingah Covid-19 vei hmuh chhuah tawh tlém azawng an awm a ni.