AMC thar siam hi kan au hla - ZPM Vice President

ZPM Ṭhalai Headquarters pisa thar, Republic Venga mi chu nimin khan ZPM vice president K Sapdanga'n a hawng a; thu sawiin, Aizawl Municipal Corporation (AMC) thar siam chu ZPM party au hla a nih thu leh ZPM chuan dâwt an tiam ve loh tur thu a sawi.

ZPM Vice President chuan, ZPM ṭhalaite'n hmasawnna ropui tak an nei tih sawiin, an lawm thu a sawi a; AMC inthlan tur chungchang sawiin, "ZPM sorkar a din theihna turin October 2020-ah candidate tur kan rem fel vek tawh. AMC thar siam hi ZPM au hla a ni," a ti a, ZPM chuan dâwt an tiam ve dawn loh thu a sawi a ni. 

AMC tharah chuan, mipuiten property tax a petu mipuite hnenah pek kir leh a nih tur thu sawiin K Sapdanga chuan, "Ram rorelna ṭha tungding turin campaign dan aṭanga fimkhur a ngai. Vote dil ṭhahnemngaih luat vanglai pawhin, Setana lawm zawnga vote zawn loh hram kan tum tur a ni. Campaign team-te'n ṭawngṭaia bul kan ṭan a, ṭawngṭaia hnu kan khar ṭhin hi chhunzawm zel ang u," a ti. 

ZPM Vice President chuan mithar hmel an hmuh belh zel nia sawiin, "Niminah ringawt pawh Aizawl khawpui chhungah mi 702 zet belhtu kan nei. Lo tel thar apiangte an tlangnel nghal theihna turin, lo awm hmasaten kan lo dawngsawng thiam tur a ni, Fapa tlanbo u ang maia a hmunnghakten lo huphurh mai tur a ni lo," a ti.

Tun hnaiah hian Mizoram hmun hrang hrangah lungphùm phùm hri a léng nia sawiin Sapdanga chuan, "Heng lungphùmte hi a taka thawhna tur pawisa a awm lo a, inthlan hma chauh daih project a ni," a ti.

Aizawl South-II bialtu MLA Lalchhuanthanga pawhin thu sawiin, "Inthlan dawn avanga thil tam tak tiam hi ZPM tih dan a ni ve lo," a ti a; thianghlim taka inthlan hmachhawn turin ZPM ṭhalaite a chah.

ZPM Ṭhalai president Malsawmzuala'n ZPM Ṭhalai project thupui, 'Kan ram tana ṭhalaite pên chhuah' tih a hawng. Malsawmzuala chuan, ṭhalaite dem ngawt tur an nih loh thu sawiin, "Hun remchang nan tur a awm loh vanga âwlthâwng ta viaua lang, thatchhe ta viaua ngaih an ni. Eibàr zawnna leh sum thawh chhuah lamah tawn fuh hun a la thleng lo mai zawk a, kan rílrem záwng tak remchanna tawn fuh ni se, ṭhang âwk âwk thei khawpa rilru chak leh taima tur an ni," a ti.

Inkhawmah hian ZPM Ṭhalai general secretary Lalthantluanga'n ZPM Ṭhalaiin ram pum huap article inziahsiak an buatsaih 'Ṭhalaite hmathlir Zoram Politics' tih a tlangzarh a; article inziahsiaka tel turin mi zawng zawng an sáwm a ni.