Covid-19 laka him ber state kan ni - Health Minister

Health & Family Welfare minister Dr R Lalthangliana chuan nimin khan cheng nuai 1,592.52 sénga sak, khum 100 awmna Siaha District Hospital sak thar a hawng a; thu sawiin, Mizoram chu India rama Covid-19 laka him ber state a nih thu a sawi.

Dr R Lalthangliana chuan, Covid-19 lakah khawvel ram changkangte pawh an tláwm tih sawiin, "Covid-19 hi kan thiamnate leh kan hmanruate thlir chuan do ve thei tur chi kan ni lo. Mahse, India ramah Covid-19 laka him ber state kan ni. Thil dang ni theiin ka hre lo, kan phâk leh tlin tâwka mimal, pawl, kohhran leh sorkarte theihtawp chhuaha kan beihna hi Lalpa'n malsawm tlakah a ngai niin ka hria. Amah kan auhna Pathianin min chháng a ni," a ti.

Mizoram chu Covid-19 vanga India rama airport khâr hmasa ber a nih thu sawiin Health Minister chuan, "Ramri pawh a khâr hmasa ber pawl kan ni. Central sorkarin lockdown a puan hmain lockdown kan puang tawh. India ram state zinga mithi tlemna ber state kan ni. Mizorama vanduaina tâwk ta mi pakuate pawh natna dang vei sate an ni," a ti a; Mizoramah hripui vei awm lohna district pali a awm mek thu a sawi.

Siaha District Hospital thar hawnnaah hian bialtu MLA Dr K Beichhua, minister of state, Health & Family Welfare Board vice chairman Dr ZR Thiamsanga, MLA leh Health secretary H Lalengmawia te pawhin thu an sawi a ni.