KHAWTHLIR

State NSS Cell ruahmannain nimin khan Civil Hospital, Aizawl Blood Bank-ah NSS volunteer-te'n thisen unit 31 an pe. Thisen petute hi KM Higher Secondary School NSS aṭangin mi 24 leh Sihphir Higher Secondary School NSS aṭangin mi pasarih an ni.

Health & Family Welfare department chuan Rapid Antigen Test (RAT) hmanga swab sample endikna man thar a tichhuak a; sorkar damdawi-in leh RAT tihna hmun danga endik man chu Rs. 200 a nih tawh thu a tarlang. 

Eswathini, Swaziland, Africa-a awm mek Roman Catholic father Alwyn Zothansanga s/o John Zoramthara, Sihphir Venghlun chu nimin chawhnu dar 3:30 khan Covid-19 leh Pneumonia avangin Shepherd Catholic Hospital-ah a thi. Thu dawn danin, Alwyn Zothansanga hi January 21, Ningani khan damdawi-inah dah luh a ni a, thâwk lamah harsatna a neih avangin oxygen pek nghal a ni. He thu ziah lai hian amah vuina hmun tur hriat a la ni lo.

MLA Lalrinsanga Ralte chuan a bial, Serlui constituency chhung, Bilkhawthlir khuaa sorkar hmalaknate a tlawh a, hna thawktute chu ruahman dan ang taka ṭhaa thawk turin a chah. 

Nimin tlai dar 5 dinhmun angin, State Referral Hospital-ah Covid-19 vei mi pakua enkawl mek an ni. SRH-ZMC Bulletin tarlan danin, mi pakuate chu Isolation ward-ah an awm vek a, ICU-a enkawl ngai an awm lo a; an zinga pakhat chu oxygen pek mek a ni. Mi pakua zingah kum 60 chung lam leh naupang an awm lo.

North Eastern Electric Power Corporation Ltd (NEEPCO) chuan nimin khan corporate social responsibility (CSR) kaltlanga an lei ambulance (Eeco van) thar chu Sinlung Hills Council (SHC) hnenah an hlan.