MJA-in kum thar inkhawm an hmang

Mizoram Journalists' Association (MJA) General Headquarters chuan nimin khan Aizawl Press Club-ah kum 2021 atan inhlan tharna hun an hmang. Inkhawm hi MJA vice president Lalremsiama'n a kaihruai a, president Zonunsanga Khiangte-in thu a sawi.

Zonunsanga Khiangte chuan, kum 2020 chhungin MJA leh an member-te'n Pathian hruaina an dawng nasa tih sawiin, "Chanchin thar zawnga hmun hrang hrang kal a ngai chungin, Lawngtlai district lamah kan member pahnihin hripui an kái tih loh chu tun thlengin Aizawl leh hmun danga kan member zingah Covid-19 kái an awm lo a, a lawmawm hle. Thinlung leh tih tak zeta hna kan thawh chuan Pathianin min awmpuiin mal min sàwm ṭhin a ni," a ti.

Kum 2022-ah MJA-in kum 50 a tling dawn tih sawiin Zonunsanga chuan, MJA golden jubilee chu ropui taka lawm tum a nih thu a sawi a; MJA member-te chu hnam inpumkhatna vawnghimtu ni zel turin a chah.

MJA President chuan, Mizoram mi, kawng hrang hranga mi hlawhtlingte chu kumin chhungin MJA-in a khát tâwka kawmna buatsaih a tum thu a sawi a; Mizorama sorkarna chelh mekte'n kum thum hmél an hmuh tawh avangin tun hmaa MJA-in an tih tawh ṭhin angin, minister-te chu an department chan ṭheuh chungchangah inkawmna (press meet) neihpui an tum thu a sawi bawk.

Zonunsanga Khiangte chuan, Mizote social media-in a rûn nasat tawh thu leh a la rûn zel dawn thu sawiin, thuthar dik tak thehdarh kawngah ṭan la a, taimak chhuah zel turin MJA member-te a chah a ni.