NH-6 siam tikhawlhkham lo turin ngen

Champhai District NGO Coordination Committee (DNCC) chuan thuchhuah siamin, National Highway no. 6, Seling-Champhai kawng zauh leh siam tur chu tikhawlhkham zawnga hma la lo turin mi tin an ngen.

Champhai DNCC tarlan danin, NH Act Chapter 16(6) zûlzuiin NH-27, Jorabat nen thlun zawm turin NH-6, Seling-Champhai kawng chu duan a ni.

Sorkarin a tum bulpui, ei leh bara ram chhung intodelh a, ram dang dehchhuah nen inpeizâwn te, ram mipui hriselna tura ṭan lâk leh thianghlimna kawnga hma lam pan tum a nih laia mahni khuaa NH kaltir tum tlat chu taksa himna leh hriselna tan pawh a 'risk' a sánga an ngaih thu an tarlang.

Champhai DNCC chuan, "Kan khawlai thianghlimna leh hriselna kawnga chêt lâkna min dâl theitu kawngpui hi khaw daifémah kal se, mipui mamawh châwk luhna link road erawh ngai pawimah ila. Hei hi ram hmasawnna leh intodelna tura kan tih tur niin a lang," an ti.

Mizorama project pawimawh tiṭhuanawp zawnga mipui leh khawtlang hmalakna a awm ṭhin avangin duh­thusamin hna thawh theih a ni lo ṭhin a, hnain a tuar ṭhin tih hre tura mipui chahin Champhai DNCC chuan, "Project cost leh estimate-a tel lo compensation beisei vanga kan hna chhiat ṭhinziate hre rengin, NH-6 Seling-Champhai kawng laih mek tikhawlhkham zawnga ruahman dan sa bâka kawng kal tur chuan eng mah i tilo ang u," tiin mipui an ngen a ni.