Chief Minister-in raw chìn tum leh Mizoram a inmilah a ngai

Chief minister Zoramthanga chuan, Mizorama rua chìn an tumte chu Mizoram leilung nen a inmil tura an ngaih thu a sawi a, rua chíng turin inzir chawp vek an nih thu a sawi bawk.

Mizoram Assembly session neih mek, a ṭan nía Governor thusawi chungchang sawihonaah February 18, Thawhlehni khan Congress Legislature Party leader Zodin­tluanga chuan, nikum lama raw chi lo thleng tawh an enkawl zui dan aṭangin Mizoram leilung nen a inmil leh inmil loh a zawt a, "Nikum lama a chî rawn thleng kha tuna in han tih velah hian a hlawhtlin hmel em?" a ti. Chief Minister chuan, "Aw, inmil ṭha turah kan ngai," tiin a chháng.

CM Zoramthanga chuan raw chungchang sawi zawmin, "Khuta ṭangin, ICU aṭangin tereuh tê tê thlawhnain an rawn thawn chho a, ni hnih/khatah a rang thei ang berin, hetah hardening turah theihtawpa lo buatsaih a ngai a; chu pawh chu kan thiamnaa kan dah khawm a ni. Delhi lamah min zirtirtu tur an awm lo. Heta kan Horticulture leh Forest-a mite'n an lo thiam dan turte kan zawt kual chawp a, khuta a titu pa ber paw'n a hre ber bik lo," a ti a; chuvang chuan an thiamna leh tawnhriat an dah khawm tih a sawi.

Raw chîn leh enkawl danah inzir chawp vek an nih thu sawiin Zoramthanga chuan, "Delhi pawh kan zirtir, keini pawhin kan zir chawp. A hmu chhuaktu pa pawhin a zir chawp ve tho," a ti a; kumin June thlaah chuan raw ṭiak 40,000 / 50,000 tal phun tura an buatsaih thu a sawi.

Mizoram leilung nena a inmil leh inmil loh chungchangah CM Zorama chuan, "He laiah chuan a ṭha teh meuh ang. Entirna'n, Latiflorus chu Nagaland-ah pawh ft. 6,000-a sángah pawh an ṭha em em mai a, phai hmun hniamah pawh an ṭha bawk. Brandisii pawh chutiang bawk chu a ni. Brandisii-te phei chu hengah pawh a ṭha duh lutuk, Burma-ah pawh a ṭha duh lutuk. Heng raw lian chi hi chu a tlangpui thuin hmun hniamah leh hmun sangah an ṭha. Amaherawhchu, raw lian chi-ah rawnàlte erawh chu hmun sangah a ṭha hauh lo tih kan hria," a ti.

Zoramthanga sawi danin, raw chî, te­reuhtê lo thlengte chu hardening turin an up ṭha leh a, tui ṭha takin an pe a, hardening hmanga tihpun chhoh zel a ngai a ni.

INC member Zodintluanga'n, 'Tuna phun tawh tur tih kha sorkarin buaipui loin private-in an buaipui zawk ta em ni?' tia a zawh chungchangah Chief Minister chuan, "Sorkarin a buaipui hi ṭha kan ti lo a. Sor­karin buaipui dawn ila, kan clerk-te tute emaw kha, sorkar hnathawk sumdawnga inhman hi a tih chi lo a. Chuvangin, a siam thiamte kha private-in indawr ula, chu chu sorkarin a lei theih nia kan hriat chu nakinah a ṭul kan tih hunah, mipuiin an phun turin kan rawn lei chauh ang, kan ti a ni," a ti.

Raw buaipui chu a hahthlak tih sawiin Zoramthanga chuan, "Tissue culture aṭanga lo chhuak hlim, hardening zet hnuah phun tura buaipui chu tih namai a ni lo. Chuvangin, 'He raw chi an tih hi India-in list an siamah pawh a tel lo,' an tih hi, a tel miah lo rêng a, an hre hek lo a, a zawna inzawn chawp a ngai a ni," a ti a; a titupa ber chu Agriculture minister Tomara, Horticulture department lam changtu a nih thu a sawi.

Chief Minister chuan, raw chungchangah sorkar laipui hotute pawh an la bo hle nia sawiin, "An la bo leh lutuk a, chuvangin, Delhi hi zirtir thiam hmasak an ngai rêng a ni. A raw chi kha hre hek lo, a raw lem kan keng a, kan entir a, zirtir thiam chawp a ngai. Tuna kan scientist neihte'n a protocol an hriat awmchhun leh keini lamina a tih tlak leh kan kalpui theih chin kan tih awmchhun chu Latiflorus leh Brandisii-te hi a la ni," a ti.

Chief Minister chuan, rua chîn leh enkawl danah an thiam chinah hma an lak thu a sawi rualin, "Kan thiamna hi kan duh tâwk lo em em a, ama'rawhchu, kan aia hria han zawh tur an awm chuang si lo," a ti a; theihtawpa an beih zel thu a sawi a ni.

Loneitute lak luh a lêta a pun tur thu sawi chungchangah Zoramthanga chuan, "Print sual palh a awm a. Number 8-naa state Level and district level 'Coordination Committee for Doubling Farmer's Income by 2020' tih in sawi kha a dik vek. Kumin a ni a, farmer's income han double-na hman a awm lo," a ti a; kum 2030 tia chhut tur chu 2020 tia chhut a nih thu a sawi.