Minister-in mobile ATB van a vailiam

Cooperation minister C Lalrinsanga chuan nimin khan Mizoram Cooperative Apex Bank (MCAB) pisa tualah mobile ATM van pahnih a vailiam. Mobile ATM van hi Mizorama a hmasa ber a ni.

C Lalrinsanga chuan, mobile ATM van chu bank nei lo khuate'n an chhawr ṭangkai a rin thu a sawi a, "Sorkar hmalak mekna Aizawl khawpuia supply fruit, vegetables and livestock market chain kalpui tur atan pawh mobile ATM van hi a pawimawh hle dawn a ni," a ti.

MCAB chu scheduled bank ni turin NPA 5% pelh ngaiah NPA 3.61% dinhmunah a ding mek tih sawiin Minister chuan, "Bank ṭha tehna Capital Risk Assets Ratio (CRAR) 16% neiin, credit deposit (CD) ratio 62% a ni a, loan pek chhuahah pawh an ti ṭha hle a ni," a ti a; kum hnih chhungin profit turn over 9.24% aṭangin 12.62%-ah a chhoh thu a sawi.

Mobile ATM van pahnih hi Aizawl leh Lunglei district tana duan hmasak a ni a, a hlawhtlin dan azirin NABARD chuan sponspor belh zel an inhuam. Mobile ATM hi Mahindra Bolero-ah vuah a ni a, Apex Bank chauh ni lo, bank danga account neite pawhin pawisa an la chhuak thei dawn a ni.