Supply Minister-in kudam a enfiah

Food, Civil Supplies & Consumer Affairs minister K Lalrinliana chuan nimin khan Zuangtuia Supply department kudam a tlawh a; Food Corporation of India (FCI) aṭanga buhfai lei leh Open Free Market (OFM) bazar aṭanga buhfai leite a enfiah.

K Lalrinliana chuan, tun hnaiah retailer ṭhenkhatin buhfai ṭha lo an dawng nia sawi a awm avangin FCI aṭanga buhfai dawn leh OFM aṭanga buhfai leite enfiah tura kal a nih thu a sawi a; buhfaite chu a ṭha thawkhata a hriat thu sawiin, "Buhfai ip sang tam tak zingah a chhia ip hnih khat a awm palh thei a, hengte hi retailer-in an dawng palh a ni thei; chutiang an dawng palh a nih chuan buhfai ṭha lo chu kudamah a ṭhain a thleng theih reng a ni," a ti.

Supply Minister hian Zuangtui kudama Leotronics company siam weighbridge dahna hmun tur a en nghal a; Zuangtui kudam hlui tawh sak ṭhatna tur NABARD funding dil mek a nih thu leh kudam ramri chin hung tura hmalak mek a nih thu sawiin, "Sorkar tharah Mizoram khaw hrang hrangah kudam 10 sak zawh tawh a ni a, a dang 21 sak mek a ni bawk," a ti.

Minister hi FCSCA secretary Vanlal­ngaihsaka, director Dr Lalhriatzuali Ralte leh department hotute'n an ṭawiawm a ni.