CAB-in Mizoram nghawngtir lo tura hma lak a ni ang - Union Home Minister
October 5, Inrinnia lehlánga Aizawl rawn tlawhtu Union Home minister Amit Shah chu Raj Bhavan-ah chief minister Zoramthanga nen an inkawm bakah, Joint NGO Coordination Committee hruaitute nen an inkawm a; Citizenship Amendment Bill (CAB) chungchang an sawipui. Amit Shah chuan, CAB-in Mizoramah nghawng a neih lohna turin hma an lak dawn thu NGO-te a hrilh.
Sorkar thuchhuah tarlan danin, CM Zoramthanga hian Union Home Minister hnenah CAB chungchang te, Mizoram Border Guard Force battalion pahnih din te, Mizoram tan all India services cadre hran neih ve a
ṭul thu te, India sorkarin Hindi ṭawng a ngaih pawimawh chhoh zel avangin Mizoramin Hindi zirtirtu a mamawh thu leh chumi kawnga harsatna state-in a tawh thu te, Special Financial Assistance-a sum dah belh chungchangte leh, Mizoram bakah hmarchhak bial pum hmasawnna tura rua hmang ṭangkaia hmalak chungchangte a sawipui a ni.
Amit Shah leh Zoramthanga te hian Mizoram chu ram dang pahnih depa awm a nih avangin ram dang nena inkungkaihna ṭha neih a pawimawh dan an sawi dun a ni. Amit Shah chuan, Mizoram chu kum tam tak chhung state rálmuang berte zinga mi a nih tawh avangin, state dang buaina tâwkte tan entawn tlak a nih thu a sawi a; CM Zoramthanga thu thlen hrang hrangte chu a ngaihtuahzui tur thu a sawi. Joint NGO Coordination Committee chuan Amit Shah hnenah hian CAB chungchang leh Tripura refugee camp-a Bru-te hruai kîr hna thawh mek chungchang an thlen.
NGO thuchhuah tarlan danin, Union Home Minister hian CAB-in Mizoramah nghawng a neih lohna tur leh ILP chak zawka thuam turin CAB-ah proviso anga belh a nih theih nan hmalak a nih tur thu Amit Shah chuan a sawi.
Amit Shah sawi danin, CAB chu sorkar laipuiin a kaltlangpui a nih pawhin, ILP nei state-teah chuan ILP chu inhumhim nan hman zel a nih theihna turin, CAB-ah telh turin ruahman a ni a dawn. Parliament-ah CAB pharh a nih hmain draft CAB chu NGO hruaitute nena enho hmasak tura tih a ni.
Joint NGO-te hian Union Home Minister hnenah hian, Tripura refugee camp-a Bru awmte Mizorama a bo a bâng awm loa an lêt theih nan leh Bru lâk lêt hna tihtawp a nih theihna atan hma la turin an ngen a; Amit Shah chuan, Bru chungchang chu a rang thei ang bera chinfel a tum thu a sawi.
Union Home Minister hmuhnaah hian Central YMA president Vanlalruata, vice president R Lalngheta, general secretary Lalhmachhuana, MUP president Lalhuapzauva, MHIP president Lalthlamuani, MZP president L Ramdinliana Renthlei leh MSU president Vanlalliana te an tel a ni.