Tripura refugee camp-a Bru hruai kîr hna thawh mek a ni

Tripura refugee camp-a Bru awm mek, Mizoram khua leh tui dik takte Mizorama hruai kîr hna chu October 3, 2019-a thawh ṭan a nih hnuah, Inrinni thleng khan chhungkaw 50 vel Mizoramah hruai lêt an ni tawh.

Home department hotute aṭanga Vanglaini thu dawn danin, Bru lak lêt hna hi Lunglei, Kolasib leh Mamit district-a sorkar official-te'n an thawk a; October 4, Zirtawpni khan chhungkaw pakhat hruai kîr an ni a, Inrinni khan Khakchangpara leh Kaskau aṭangin chhungkaw pakhat ve ve hruai kîr leh an ni bawk.

Lak lêt ṭan ní, October 3-ah Lunglei district-a awm tur chhungkua 41 (mi 164) leh Mamit district-a awm tur chhungkaw paruk (mi 27) hruai kîr an lo ni tawh a; tun thlenga hruai kîr tawh zawng zawng zat chu chhungkaw 50 an ni. Bru hruai kîr hna hi November 30, 2019 thleng thawh tura ruahman a ni a; nimin chu Pathianni a nih avanga chawlh lailâwk a nih hnuah vawiin aṭangin chhunzawm leh a ni ang.

Bru-te lak lêt hna thawhnaah buaina lian tham a awm lo a, mahse, refugee camp-a Bru pawlte chuan hruai kîr an duh lo tih lantirna banner-te an tár a ni.