Mizoram sum dinhmunin a sen a kâwk - Congress Ṭhalai

Mizoram Pradesh Youth Congress Committee (MPYCC) chuan thuchhuah siamin, Mizoram economy a sawprawp chak hle tih Mizoram Economic Survey 2019-20 ah a lan thu an tarlang a, "Mizoram sum dinhmunin hlauh­awm chin a sen a kâwk a ni," an ti.

MPYCC chuan, February 18, 2020-a Assembly-a pharh tâk Mizoram Economic Survey 2019-20 ah kum khat lek chhungin Mizoram economy a hniam chak hle tih sawiin, "MNF sorkar hian sum leh pai enkawl a thiam lo nge, Congress sorkar laia sum khawl sa a chèn zo tê tê a, din­hmun hlauh­awmah min dinpui leh si?" an ti a; sum enkawltupa hmuia pawisa tam ringawt chu Mizoram economy-in a 

ṭhatpui lo tih an sawi.

Congress ṭhalai tarlan danin, budget pumpuia sum indaih lohna sum pûka hnawhkhah ngai chu Fiscal Deficit tih a ni a, ram sum leh pai dinhmun economy ṭhat leh ṭhat loh tehfung atana pawimawh leh awmze nei ber a ni. Finance Commission-in fiscal deficit chu GSDP aṭangin 3% aiin a tam tur a ni lo, chu aia a tam chuan ram sum/economy dinhmun a chhe hle tihna a ni, a tih laiin, kum 2019-20 chhunga Mizoram fiscal deficit chu 8.34% a tling. Chutih laiin, Congress sorkar kum tawp, 2018-19 ah chuan Mizoram fiscal deficit chu 1.58% a ni.

Mizoram economy hmasawnna thlen thei, mi tin thleng phak hmasawnna lam hawia hma la a, sum leh pai din­hmun tluchhe mek siamṭha vat turin MPYCC chuan chief minister Zoramthanga, Finance minister ni bawk chu an phût a, "A ngaihna a hre lo a nih chuan a ngaihna hria Pu Lal Thanhawla leh Finance minister hlui Pu Lalsawta thuràwn la ngam turin kan ràwn a ni," an ti.