Naupang rûkbo tum anga sawite Thu dik lo vek a ni - Mizoram Police

Mizoram police hotute chuan, tun hnaia naupang hruai bo leh rûk bo tumna a awm anga sawi zawng zawng chu thu dik lo vek a nih thu an sawi a, tun hnaiah police-te'n naupang hruai bo thubuai ziah luh an neih loh thu Vanglaini an hrilh.

Vanglaini palai zawhna chhangin Aizawl SP C Lalzahngoa chuan, tun hnaiah naupang hruai bo leh rûk bo tum chanchin social media-ah darh nasa hle mah se, thu dik lo a nih thu a sawi a, "Aizawl district-ah chuan naupang hruai bo leh rûk bo thubuai kan nei lo," a ti.

Aizawl SP chuan, district dang, Keiṭum leh Kolasib khuaa naupang hruai bo tum nia sawi pawh thu dik lo a nih thu sawiin, "Dawt muhlûm a ni. Naupang hruai bo tumna a awm anga sawi a awm deuh pawhin, police-te'n kan en zui chinah chuan naupang hruai bo leh rûk bo lam thil a ni lo vek a ni," a ti a; tun hnaia social media hrang hranga thu thehdarhte chu thu dik lo a nih thu a sawi.

Tun hnaia thuthangte chu thu dik lo a nih thu a sawi rualin C Lalzahngoa chuan, fimkhur reng erawh a ngaih thu a sawi a, "Hnam dang lakah a ni emaw, Mizo lakah pawh ni se, nu leh pate'n kan fate kan enkawl uluk a, kan fimkhur chu a ngai hrim hrim. Naupang thlahthlam loh hi a him ber a ni," a ti a; thu chiang hre si loa social media thu thehdarh (post) zung zung lo turin mi tin a ngen a ni.

Hetih lai hian, Mizoram Police chuan thuchhuah siamin, tun hnaia Mizorama naupang rûkbo tumna a awm anga an sawi khua - Keiṭum (September 19), South Lungpher (September 30) leh Kolasib (October 1) thil thlengte chu inrukbona lam thil a nih loh thu leh, October 1-a Bungzung khuaa VDP-in hnam dang pahnih an mante pawh naupang rûkbo nen inkungkaihna a neih loh thu an tarlang.

Police thuchhuah chuan, tun­lai­in hnam dang mi, naupang rûkbo tum an awm hriat a ni lo tih tarlangin, "Mizoram Police chuan mipuite chî-âi lo turin a ngen a. Chutih rualin, thil duhawm lo thleng palh thei lakah Mizoram hmun tina police-te mit leh beng chhi reng tura hriattir an ni," a ti.