NE Handloom and Handicrafts Exhibition Home Minister Amit Shah-a'n a hawng

North Eastern Council (NEC)-in Mizo High School Field-a North East Handloom and Handicrafts Exhibition an buatsaih chu September 5, Inrinni khan Union Home minister Amit Shah, North Eastern Council (NEC) chairman ni bawk chuan a hawng.

Amit Shah chuan, prime minister Narendra Modi kaihhruaina hnuaiah India hmarchhakin chak takin hmasawnna leh remna kawng a zawh tih sawiin, "Kan term hmasa kum nga chhungin nasa takin Mizoramah hmasawnna a thleng. Megawatt 60 pe chhuak thei Tuirial Hydel Project te, Bairabi rél kawng lian nena thlun zawm te, km. 158-a thui Kaladan Multi Modal Project te, Myanmar ramri dep khua Hnahlan, Vaphai, Zote leh hmun danga border haat siam te, cheng vbc. 51 senga sak Sainik School-te leh thil dangte tihhlawhtlin a ni," a ti.

Home Minister chuan, India rama state zingah Mizoram chu nuam leh mawi bera sawi a nih thu sawiin, "Mizoram hian India democracy-ah dinhmun sang tak a chang a, tun hmain Mizoram chu rambuai leh tharum thawhna hmun a ni ṭhin a, tunah chuan chu'ng hun khirh leh hrehawmte chu kalsan tawhin ram rálmuang tak a ni tawh," a ti a; Mizoram chu India ram mai ni lo, khawvel huap pawhin muanna leh inunauna puang chhuaktu leh meichher chhitu, tia hriat lâr a nih thu a sawi.

13th Finance Com­mission-in Mizoram tan cheng vbc. 19,974 a pek laiin, NDA sorkar hnua din 14th FC chuan Mizorama hmasawnna hna hrang hrang thawh nan cheng vbc. 42,972 a pe tih sawiin Amit Shah chuan, "Mizoram chu state dangte nen hmasawnna kawnga ang khata an awm theih nan leh kawng tinrénga Mizorama hmasawnna a awm thei nan, Mizoramin harsatna a tawhte sutkianna tur leh Mizoram pui turin engtik lai pawhin central a inhuam reng tih Mizoram Chief Minister-in hria se ka duh," a ti.

Union Home Minister chuan, tualchhung deh chhuah leh thil siamte'n hmarchhak biala hmasawnna a thlen theih dan sawiin, "Puantah leh thiamhnáng deh chhuah hmangin Mizoram mai ni lo, hmarchhak pumah nasa takin eizawnna kawng thar a inhawn belh thei a, mipuite anmahni kut leh kea ding turin a puih thei dawn a ni," a ti a; PM Modi-a sorkarah maute horticulture product anga dah hnuah hmarchhak bialin an hlâwkpui ber dawn thu a sawi.

DoNER minister Dr Jitendra Singh pawhin thu sawiin, "Kum 65 kal ta aiin kum nga kal taah khan Mizoramin hma a sawn zawk. Narendra Modi kaihhruai sorkarin vote bank politics an ngaihtuah lo a, hmasawnna chiah an veiin an ngaihtuah. Ṭhalaite eizawn nan leh hna zawn nan Hindi thiam a pawimawhzia Mizoram CM pawhin ṭum eng emaw zat sorkar laipuiah a thlen a ni. Hindi zirtirtu a nghet a dah turin a rang lamin hmalak a ni dawn," a ti.

Thusawitu dang, chief minister Zoramthanga chuan, state dang ngaihtuahin Mizoram chuan châk lakna tur chi hrang hrang a nei tlem bik tih sawiin, "Chutih rual chuan, a chhunga awm sa leilung hausakna awmte a ṭangkai thei ang bera hmanga ram tihhmasawn leh intodelh theih nan hmalak a ni a, hmalakna hrang hrangah sorkar laipui puihna pawh kan mamawh," a ti a; Mizoramin kum 10 hnuah India rama per capita income sang ber nih a tum thu a sawi.

Lawmthu sawitu Assam Finance minister Himanta Biswa Sharma chuan, Amit Shah-a'n Home minister a nih hnuah India hmarchhak zingah Mizoram a tlawh hmasak ber thu sawiin, "Guwahati-ah chuan a kal tawh a, mahse, kha chu NEDA meeting-a tel turin a ni a, Assam tlawh tur hrim hrim a ni lo. Mizoram hi a tlawh hmasak ber a ni a, hei hian Mizoram a ngaih pawimawhzia a tilang a ni," a ti.

NE Handloom and Handicrafts Exhibition-ah hian hmarchhak state hrang hrangte kutchhuak pho chhuah a ni a, October 8, 2019 thleng a awh ang. Amit Shah hian chawhma dar 11:45-ah Lengpui Aiport a rawn thleng a, Home minister Lalchamliana hoin official-te'n an lo hmuak. Lengpui aṭangin helicopter hmangin Ṭhuampui a pan a, CM Zoramthanga, Lok Sabha MP C Lalrosanga, Himanta Biswa Sharma, chief secretary Lalnunmawia Chuaungo leh DGP SBK Singh ten an lo dawngsawng a, Tawlhloh puan lo bahtir a ni. Ṭhuampui aṭangin Mizo H/S Field a pan.