KHAWTHLIR

Inrinni khan Chanmari West Branch YMA chuan thisen pek rûnpui huaihawtin, Aizawl Civil Hospital (ACH) tan thisen unit 209 an pe a, petute mipa 175 leh hmeichhia 34 an ni. Evangelical Baptist Convention Church ṭhalai, Baptist Youth Fellowship pawhin an silver jubilee pualin ACH blood bank-ah thisen unit 44 an pe a, a petute hi mipa 38 leh hmeichhia paruk an ni. KṬP Maubuang Branch-in State Referral Hospital-ah thisen unit 22 (mipa 20, hmeichhia 2) an pe a, Chawnpui Vengthlang Branch-in Synod Hospital tan unit 20 (mipa 19, hmeichhia 1) an pe. Champhai Taxi Drivers' Association-in an din champha vawi 30-na pualin Champhai District Hospital-ah unit 21 an pe bawk.

ZPM Political Affairs Committee member-te tun hnaia ṭhukhawm chuan, November 5, 2019-a Sinlung Hills Council (SHC) inthlanpui awm tur chungchang­ah resolution an siam a, "SHC huam chhunga kan mite kan ring tâwk a, ṭha an tih anga hmalak kan remti," an ti.

Ramhlun North Branch YMA leh AMC ward no. III councillor K Romawia bultumin an veng a him zawk theih nan veng chhung hmun 12-ah CCTV an dah thar a, chu'ngte chu Inrin­ni zing khan Ramhlun Sporting Club field-ah K Romawia'n a hawng. CCTV bunna tur senso hi K Romawia hian a ngaihtuah a, YMA-in hnatlangin an vuah a ni.

Border Area Development Programme sum cheng nuai 40 senga Champhai Vengthlanga sak tur Saihnuna Memorial Hall lungphum chu October 4, 2019 khan bialtu MLA Dr ZR Thiamsanga'n a phum. Hall-ah hian auditorium, badminton court, van­tlang hmun leh garage-te a awm dawn a ni.

Mizoram Baptist Koh­hrana pastor bial hrang hrangte chuan October 4, Zirtawpni aṭang khan bial inkhawmpui an hmang a, nizan khan a ṭiak. Zirtawpni khan Baptist Kohhran Hmeichhe pawl leh Baptist Mipa Pawl-te'n rorel inkhawm an nei a, Inrinni khan BCM pastor bial rorel inkhawm neih leh a ni.