MPCC leh ZPM-in CAB duh lohna memorandum an thehlut

Mizoram Pradesh Congress Committee (MPCC) leh Zoram People's Movement (ZPM) chuan Inrinnia Aizawla lo zin, Union Home minister Amit Shah hnenah Citizenship Amendment Bill (CAB) an duh loh thu tarlanna memorandum an thehlut.

MPCC chuan, Mizo mipui aiawhin hmarchhak state-a hnam tlem zawkte dinhmun ngaihtuaha CAB kaltlangpui lo turin sorkar laipui an ngen thu an tarlang a, "Chhànna lawmawm tak hmuh kan inbesiei. CAB hi Mizoram bakah, hmarchhak state-a hnam tênaute tan a him lo. Assam sorkarin National Register of Citizens a kalpuia India khua leh tui ni lo mi nuai 19 chuang an awm dan aṭangin a chiang a ni," an ti.

Mizoram ṭhenawm ram ṭhenkhata minority-te chu India rama lak luh a, India khua leh tuia pawm an nih dawn chuan hmarchhaka cheng hnam tlem zawkte tan inchîmralna thleng thei a nih avang leh chhan hrang hrang avangin an welcome theih loh thu memorandum hmangin Amit Shah an hrilh a ni.

Zoram Peoples' Movement (ZPM) chuan, memorandum an thehluhah chuan, sorkar laipuiin CAB tharthawh leh a tum an duh loh thu an tarlang a, "Bangladesh aṭangin raltlan dan loa ramri kana Mizoram a lut tam tak an awm a, heng mite hi Article 371(G) leh Inner Line Regulation-te hian a veng hneh lo a, tun thlengin dan loa ramri kâna Mizoram lutte vanga harsatna chu chinfel theih a la ni lo," an ti.

Mizoram chhim lama dan loa lo lut (Chakma)-te chu an pun chak thu tarlangin ZPM chuan, "Khawvel nihphung aṭanga teh chuan kum 10 chhunga an punna hi thil theih loh a ni ," an ti a; Chakma pun chak dan chu ram danpui kalha thil tih awm lo se chuan thil theih a nih loh thu an tarlang.

ZPM tarlan danin, CAB chu pass a nih chuan Chakma foreigner, dan loa Mizorama lutte chuan khua leh tui nihna chawp leh chilhin an nei thei dawn a, chu chuan ram leilung fa Mizote chanvo leh hamṭhatna nasa takin an chuhpui thei dawn. Mizoram Peace Accord-in a tum ber, Mizote hnam zia leh nunphung venhimna tura inremna bawhchhiatna a ni.

ZPM hian Mizoram leh Assam ramri buai chungchang pawh memorandum-ah an tarlang a; sorkar laipui chu inrawlh tur leh Bengal Eastern Frontier Regulation 1875-in status quo-a puan anga dah turin an ngen a, Assam police-te'n ramri vanga Mizo ṭhalaite kut an thlak chu an dem thu an ziak bawk.

CAB an duh lohzia lantir nan leh an duh lo a ni tih Amit Shah-a'n a hmuh theih nan ZPM party ṭhalaite chuan October 4, Zirtawpni zan khan Aizawla hmun hrang hrangah CAB duh lohna thuziak (poster) eng emaw zat an târ a ni.