CAB dodal ngam lo-ah MNF sorkar puh
Mizoram Pradesh Congress Committee (MPCC) chuan October 5, Inrinni khan thuchhuah siamin, MNF kaihhruai sorkar chu BJP malsawmna duh vanga Citizenship Amendment Bill (CAB) dodal ngam lo-ah an puh.
MPCC chuan, MNF kaihhruai sorkarin sum leh pai harsatna a tawk mek tih sawiin, "Central-a an thawhpui BJP sorkar malsawmna an mamawh êm avangin Mizoram leh Mizo hnam tana chîmralna kawng thlen theitu tur dan hlauhawm CAB an dodal ngam lo. CAB dodalna lantir tuma NGO Coordination hmalakna an hmehmih bakah, dodalna lantir an awm loh nan dan khauh tak hmangin Aizawl khawpui chhung hmun tam takah Cr.PC 144 an puang a ni," an ti.
Congress party chuan, CAB dodalna lantir tumte laka MNF sorkar chet dan chu mak an tih thu sawiin, "Mizoram tana dan sakei CAB dodal tum tak tak loah MNF sorkar hi kan ngai. CAB hi a taka kaltlangpui a nih a, Mizote himna tura ruahmanna a awm lo a nih ngat chuan MNF party hi Mizote himna tiderthâwngtu leh mawhphurtu, hnam phatsantu dik tak an ni ang," an ti a; Joint NGO-in Union Home Minister hmuh tura CAB dodalna lantir an tum hnua chawpchilh taka thu sût a, CAB dodalna a taka lantir a ni ta lo chu pawi an tih thu an sawi bawk.
MPCC tarlan danin, Congress party chuan CAB chu a tìr tê aṭangin an dodal nghal a; Lal Thanhawla chief minister a nih laiin Union Law & Justice minister Ravi Shankar Prasad leh Joint Committee on CAB chairperson Dr Satyapal Singh te hnenah CAB dodalna lehkha na takin a lo thawn tawh a ni.