Aizawl water supply phase III siamah Hna thawh tur 85% zawh a ni tawh

State Investment Programme Manage­ment and Implementation Unit (SIPMIU), Aizawl chuan 'Augmentation of Water Supply and Construction of 37 mld (million litres per day) Water Treatment Plant for Aizawl Phase-III' (Water Supply Phase-III tia sawi bawk) chu an siam mek zel a; hna thawh tur 85% zawh tawh niin, September 2020-ah zawh tum a ni.

SIPMIU programme director Lalro­thanga chuan, Aizawl Water Supply Phase-III hna thawktu contractor Eco-Protection, Chennai chu an hnathawhah an ṭan thu leh sawiselna tur awma an hriat loh thu a sawi a; sorkar department-te leh mipui puihna an dawn ṭhat avangin an lawm thu Vanglaini a hrilh.

Lalrothanga chuan, Asian Development Bank (ADB) project-te chu June 22, 2019-ah a tàwp vek dawn tih an hriat sa avang leh ADB project a tàwp chuan state sorkar phur a rih dawn avangin Water Treatment Plant for Aizawl Phase-III siamtu contractor an ṭang hle niin a sawi a, "An hnathawh hi Ministry of Housing & Urban Development consultant Pritam Kapur pawhin ṭha a tih thu leh Central hotute pawhin rawn en se a duh thu a sawi a ni," a ti.

SIPMIU Director sawi danin, fûrpui laiin hna thawh a harsat avangin kumin May thla aṭangin Tlawng lui aṭanga tui hîpna ber tur (intake) siam hna chawlhsan rih a ni a, ruahtui tlak zawh veleh thawh chhunzawm nghal an tum. Tui pipe lian pawh Tlawng lui aṭanga Zohnuai thleng phûm a ni tawh a, Vaivakawn aṭanga Hunthar Veng leh Chanmari West aṭanga Laipuitlang thleng phûm hmabak a la awm.

Aizawl khawpui chhunga pipe phûm turah mipui ṭawiawmna an mamawh tih sawiin Lalrothanga chuan, "Fûr zawh hunah pipe phûm a ṭul dawn a, mipuiin harsatna min siamsak lo se kan duh a, min ṭawiawm turin kan ngen a ni," a ti a; pipe phûm chu a ṭha chi a nih avangin kum 30 thleng daih tura ngaih a nih thu a sawi.

Tlawng tui chu Greater Aizawl Water Supply Scheme (GAWSS) Phase I leh Phase II hmangin Reiek kâiah lak a nih mek avangin Phase III tan tui a tam tâwk dawn em tih zawhna chu sawifiahin SIPMIU hotute chuan, "Phase III hna kal laiin a mamawh zat tur chu 37 MLD (million litres per day), ni khatah tui litre maktaduai 37 (nuai 370) a ni a, tui tlem laia kan tehin 60 MLD a ni. Phase III tui lakna hi Reiek kai aṭangin km. 8 a ni a, Reiek kai thlang lamah Dialdâwk lui, Tuithûm leh Tuikual luite'n an fin belh a, tui lak turah harsatna a awm lo ang," an ti.

SIPMIU hotute sawi danin, Water Treatment Plant for Aizawl Phase-III hi Aizawl khawpui hmar lam zawng chàwmtir tum a ni a, Phase I (10 MLD) leh Phase II (24 MLD) ten Aizawl chhim lam an châwm thung ang. Phase III pipe-in Laipuitlang a zawm nghal tawh dawn avangin Tuikhuahtlang aṭanga Phase I & II châwm tur vengte pawh huamtir tel dan ngaihtuah a ni.

SIPMIU & Wadia Techno Engineer Services-in Aizawla chêngte leh tui mamawh zat tur project siama an chhût dan chuan, kum 2018-ah khan Aizawlah mi 3,39,992 an awm a, ni tina tui mamawh zat chu 54.63 MLD a ni. Chutih laiin, GAWSS Phase I&II-in tui 34.8 MLD a pe thei a, 19.83 MLD-in mipui mamawh a phuhru zo lo.

Kum 2033-ah Aizawlah mi 4,45,131 awm turah ngaih a ni a, tui mamawh zat chu 71.22 MLD ni tura chhut niin, Phase I, II & III-te'n ni khata tui an pek theih zat chu 71.8 MLD a ni ang. Kum 2048-ah Aizawlah mi 5,57,543 awm tur leh ni tin tui 88.92 MLD mamawh tura chhut a ni.