NEWS TAWI
SDG zirho
Planning & Programme Implementation department chuan nimin khan Serchhip DC conference hall-ah 'Sensitization workshop on Sustainable Development Goals (SDG) for line department' an buatsaih a, Serchhip DC Dr Lalzirmawia Chhangte-in a hmanpui. He hunah hian DC-in thu a sawi bakah, SDG chief consultant Lalchhuanawma Hrahsel-in SDG nihphung a sawi a, SDG consultant Lalnunmawia leh C Vanlalzawna ten SDG chungchanga thil pawimawhte an sawi bawk.
MPC-in pawi an ti
MPC party chuan thuchhuah siamin, Mizorama Legislative Assembly-ah kawlphethaa intodelh buaipui an awm lo niin an tarlang a, "Vawiin thlenga Mizoram dinchhuahna leh hmasawnna hnukpui ber kawlphethaa intodelhna buaipui phâk lo MLA rual kan la hrawn fo mai hi pawi kan tiin, rualawh thlak kan ti hle a ni," an ti.
Siahaah ePoS sem
Nimin khan Siaha DC conference hall-ah Siaha district civil supply officer (DCSO) C Zadailova kaihhruaiin Siaha district-a Supply center 21-a retailer 114-te hnenah Electronic Point of Sales (ePoS) khawl sem a ni a, a hman dan an inzirtir nghal. ePoS hi Siaha district-ah March 2020
aṭanga kalpui ṭan tur a ni.
Serchhipah hnam dang enfiah
Serchhip police-te leh YMA Sub-Hqrs., Serchhip hnuaia Kumpuan Committee hmalaknain February 18, Thawhlehni zan khan Serchhip khawpuiah hnam dang dan loa awm an awm leh awm loh enfiah a ni a, mi 22 khâwm an ni.
YMA Sub-Hqrs. Serchhip tarlan danin, endiknaah hian Serchhip khawpuia YMA branch hrang hrang hruaitute leh police-te'n Serchhip leh a chhehvela hnam dang awmte dan anga awm an nih leh nih loh an endik a; ILP enfiahsakin, ILP fel lo leh hmang dik lo nia hriatte leh zu rûite nen mi 22 chu Serchhip Police Station-ah an hruai a ni.
Serchhip YMA chuan, hnam dang Mizorama lut tam takin ruihhlo an ken luh ṭhin avangin fimkhur thar a ṭul hle tih an tarlang a; Mizo zingah mahni hna thawk tur ni miah loa hnam dang sponsor ṭhin an awm tih sawiin, "A pawi kan ti a, tualchhunga politician leh mi langsar leh challang tak tak zingah fel lo taka hnam dang ruai leh ILP chungchanga YMA leh police hmalakna ngaitheilo lek lek an awm ṭhin hi YMA chuan a pawi kan ti," an ti.