Bru chhungkua 53 an rawn lêt tawh Anmahni lâk lêt tumtute an lo dang
Bru lâk lêt thawh 9-na kal mekah Bru-te'n phût an neih avangin nimin khan anmahni hruai tumtu sorkar official-te leh lirtheite an lo dang a, lak lêt hna chhunzawm theih a ni lo. October 3, 2019-a Bru repatriation ṭanah nimin thleng khan chhungkua 53 Mizoramah an rawn lêt tawh.
Mamit DC Dr Lalrozama chuan Vanglaini palai zawhna chhangin, Bru-te chuan hmun hrang hrangah anmahni hruai kîr tura kal sorkar official-te leh motor-te an lo dan avangin lak lêt hna thawh theih a ni lo tih a sawi a, "Hei vang hian Bru la let tura kal official-te chu an camp - Kanhmun leh Kanchanpur-ah an lêt leh a ni," a ti.
Dr Lalrozama sawi danin, Bru lak hna thawktu sorkar official-te chu Kânhmun leh Kanchanpur (Tripura)-ah an inkulh a; Mizoram aṭanga a hnai deuh camp pathum - Kaskau, Khakchangpara leh Hamsapara-a mite hruai turte chu Kanhmunah an inkulh a, camp hla deuh pathum - Asapara, Naisingpara leh Hazacherra-a mite hruai turte chu North Tripura district headquarters Kanchanpur-ah an inkulh thung. Kanchanpur hi Kânhmun aṭangin km. 34-a hlá a ni.
Nimina Bru hruai kîr tura thawk chhuakte chu Bru mipuiin an lo dang tih sawiin Dr Lalrozama chuan, "Buaina dang a awm lo a, kut inthlakna emaw, lirthei khawih emaw a awm lo a, repatriation team-te pawh him takin an awmna Kanhmun leh Kanchanpur-ah an let leh thei vek a ni," a ti.
Mamit Bawrhsap chuan, hmalak zel dan tur chu sorkar hotute thu thu a nih thu sawiin, "Kan hotute thu kan ngaichâng rih a, tih dan tur an rawn sawi ang zelin hma kan la ang," a ti a; vawiin (October 8) erawh chu bazar ní a nih avangin ruahman lâwk angin chawlh an tum hrim hrim thu a sawi.
Hetih lai hian, Bru camp-a awm chhungkaw pahnih chuan anmahni duh thlannain Mizoram an rawn pan a, nimin khan Kanhmun an thleng a; Kanhmun aṭangin an awmna tur Hortoki khua, Kolasib district lamah hruai nghal an ni.
Heti hian, October 3, 2019 aṭanga Bru rawn lêt tawh zat chu - Lunglei district-ah chhungkua 42, Mamit district-ah chhungkaw pakua leh Kolasib district-ah chhungkaw pahnih an ni.
Tripura-a Bru relief camp zinga a hnai ber Kaskau chu Kanhmun aṭangin km. 2 leka hla a ni a; Kanhmun aṭang vêkin Khakchangpara chu km. 19 leh Hamsapara chu km. 36-a hla a ni. Kanhmun aṭangin Kanchanpur khua chu km. 34 a ni a, Kanchanpur aṭanga Bru camp dang pathum hlat zawng chu - Asapara km. 13, Naisingpara km. 16 leh Hazacherra km. 23 a ni.
Bru lak lêt thawh 9-na ṭan ní, October 3 aṭangin refugee camp-a Bru pawlte chuan hruai kîr an duh lo tih an lo lantir tawh a; banner hrang hrang an tàrah chuan, lak lêt an nih dawn chuan khaw din thara dah an duh thu te, an awmna tur an duhna hmun thlantir an duh thu te, Bru-te tana autonomous district council pek an phût thute leh thil dang eng emaw zat an tarlang.
Hetih lai hian, Bru hruai kìr hna ṭan hma lawka Bru camp-a Mizoram khua leh tui dik tak enfiahnaah, chhungkaw 4,323 chuan Mizorama kîr an duh thu an sawi a ni.