Police-in nupui sawisa hluma puh man

Indian Reserved (IR) police PC Vanlalringa (kum 50 vel), Pukpui, Lunglei, tuna Zawlpui, Mamit district-a awm mek chu October 6, Pathianni zanah a nupui a sawisa hlum nia sawi a nih avangin police-in an man a; thil thleng duh loh lantir nan Zawlpui Branch MHIP chuan nimin khan an khuaah kawng an zawh.

Zawlpui V/C president V Zonunchhara'n Vanglaini palai zawhna chhanga a sawi danin, PC Vanlalringa te chhungkua hi Zawlpui IR post-ah an awm mek avangin Zawlpui khuaah an awm a, Lunglei lam mi an ni. Pathianni zan dar 9-10 vel khan a nupui Lalhlimpuii (42) chu a sawisa a, Lalhlimpuii chu a hliam tuar loin Pathianni zan vêk khan a thi a ni.

Lalhlimpuii hi a nâkruh pathum a tliak a, a dulah hliam na tak a tuar bawk. A ruang hi Zawl­nuam damdawi-inah nimin khan endik (postmortem) a ni a, chumi hnuah an khua, Lunglei Pukpui panpui  nia thu dawn a ni. PC Vanlalringa chu Pathianni zan vek khan police-in an man nghal.

PC Vanlalringa'n a nupui a sawisak hlum an duh lohzia leh an demzia lantir nan Zawlpui Branch MHIP chuan nimin khan an khuaah kawngzawh an huaihawt a, mi ṭhahnem tak an tel. MHIP-te chuan, PC Vanlalringa chu a na thei ang bera hrem an phût thu an aupui a ni.