V/C thuam ṭhat dan tur sawiho

Nimin khan chief minister Zoramthanga hoin CM Cabinet Mee­ting Room-ah village level-a khawtlang inrêl­bàwlna thuamṭhat, Reformation of Mizoram Rural Administration chung­changah Local Adminis­tration Department (LAD) hotute nen sawiho a ni a; LAD minister K Lalrinliana leh Drafting Committee member-te an tel.

Sorkar thuchhuah tarlan danin, Drafting Committee hian Sikkim-a khawtlang inrêlbawlna an kalpui dante zir chiangin, Panchayati Raj Institution (PRI) leh tuna Mizoramin village council system a hman mek khaikhinin rawtna an siam a, chungte chu nimina CM hoa meeting-ah pharh a ni. Tuna Mizoramin V/C inrêlbawlna chu hmun ṭhenkhatah siamthat ngai lai awma an hriat thu te, PRI dung zuia felfai zawka siam danglam thei laite rawtna siam a ni.

Ṭha zawka hna an thawh theih nana khaw­tlang hruaitute chu thuam chak a ṭul thu te, PRI kalphung angin district level-a advisory body siam te, sorkar hmalakna hrang hrang inthuah a awm loh nan a kalphung mumal tak neih te, sum hman leh sum vawn dan felfai zawk a awm theih nana inkaihhruaina mumal zawk siama audit neih ṭhinte sawi a ni bawk.

Tun dinhmunah Mizo­ramah V/C 534 a awm mek a, chu'nga seat awm zawng zawng chu 2,260 a ni.