RTI Week 2019 hman a ni

Nimin khan Mizoram hmun hrang hrangah Right to Information (RTI) Week, 2019 hman a ni a, Aizawlah chuan Synod Conference Centre-ah chief minister Zoramthanga hoa hman a ni. CM chuan, langtlang sorkar a awm theih nan mipuiin RTI Act an hman thiam a ngaih thu a sawi.

Chief Minister chuan, RTI Act a pian chhuah dawn velah chuan duh lotu tam tak an awm thu sawiin, "Tunah chuan a ṭhatzia mipuiin kan hmu tawh. Langtlang sorkar, thianghlim leh rinthlak kan neih theihna tur zawk a ni a,mipuiin kan hman thiam a ngai. Tunah chuan khawvel information system a ṭha tawh a, thurûk a awm thei tawh lo," a ti.

RTI Act hmangin duh zawng zawn chhuah theih a nih thu sawiin Zoramthanga chuan, "Chu chuan thil sual tih tumtute a khap a, dik lo taka thil sual tih tum an awm tawh lo. Mi dik tan hlauh tur a awm lo. Hman sual palh awm thei a ni a, lei chawi leh lung-in tàn theihna a ni thei," a ti a, dik leh thianghlim taka RTI Act hmang turin mipui a chah.

Chief Minister hian RTI Week puala 'College Level Slogan Writing Competition' buatsaiha a ti ṭhate hnenah lawmman a sem a; lawmman dawngtute chu - pakhatna K Lalnunsanga (Hrangbana College), pahnihna C Lalnunmawia (Hrangbana College) leh pathumna Lalhruaitluanga (Pachhunga University College)-te an ni.

Chief information commissioner (CIC) Lalduhtlana Ralte chuan, department-a RTI Act buaipuitute (SPIO, SAPIO, etc.) chu an hna pangngai bakah dinhmun pawimawh tak dang chelh tura ruat an nih thu a sawi a, "Ṭhenkhat chuan phurritah an ngai ṭhin. Mizoram tan dinhmun pawimawh tak an chelh zawk a ni. RTI Act hlawhtling taka hman a nih theih nan department-in record an neih ṭhat a ngai," a ti.

Lalduhthlana Ralte chuan, RTI Act hmanga thil dil a nihin, record awm ang ang pek tur a nih thu a sawi a, "Paih ṭhen emaw, belh emaw neih tur a ni lo. Mimal leh ram venhimna lam thil pek chhuah chi loa ngaih an dil a nih chuan, pek chhuah theih loh chhan nen a diltu hriattir tur a ni," a ti a; RTI Act chu mipuite'n hmang uar deuh deuh se an duh thu a sawi.

Mizoramah RTI Act hmang an la tlèm thu sawiin CIC chuan, "RTI Act hman tlem chhanah kan mizia, intih­hmingchhiat leh inhmaizah tawnna vang nia sawite a awm ṭhin. Chutiang chu zawhna zawh loh chhanah a tling tur a ni lo. Mipuiin hnathawktute hnathawh dan an hriat chian chuan thathona leh dik taka siam duhna a pe dawn a ni," a ti.

Chawhnu lamah sawihona hun hman a ni a, CIC, information commissioner Zorammawia, information commissioner Dr C Lalzarliana leh Transport deputy secretary Vanlalvuana ten thu sawiin zawhnate an chháng a ni.