MR zirtirtu laka chinfel ngai chinfel zawh a ni ṭêp tawh - Education Minister

School Education minister Lalchhandama Ralte chuan, zirtirtu muster roll (MR)-a thawk tur mi 800 chuang lak thara chinfel ngai chinfel hna zawh ṭêp a nih thu a sawi a, "Appointment order inpek theih a ni ṭêp tawh," a ti.

Vanglaini palai zawhna chhangin School Education Minister chuan, uluk takin MR zirtirtu lakah fel lo a awm leh awm loh enfiah a nih thu a sawi a, "Hmun hrang hrang aṭanga fel lo nia sawi awmte uluk taka enfiah a ni. A tling leh thiamte'n hna an hmuh ngei hi sorkar duh dan a ni a, chu vang chuan enfel hna thawh a ni," a ti a; rei lo têah a tlingte hnenah appointment order pek a nih tur thu a sawi.

Lalchhandama Ralte chuan, zirtirtu hna chu mi sang chuangin an dil avangin an document-a thil dik tâwk lo awm hna latute'n an hmuh fuh loh a awm thei nia sawiin, "A tlangpuiin a ṭha thawkhat a, ṭhenkhat eng emaw thil lian tham lutuk lo dik lo palh awmte a awm. Hna lak endik ṭhat leh hi duhsak zawngte thun tumna a ni lo," a ti.

Tarlan tawh angin, MR-a thawk tur zirtirtu 881 laknaa tlingte hming chu September 20, 2019 khan School Education department website-ah tihchhuah a ni a, appointment order erawh pek a la ni lo. MNF treasurer Vanlalzawma chuan September 23 khan Mizo Hnam Rûna thu a sawinaah, Chief Minister nen an inbiak­naah, 'Zirtirtu MR lak result tihchhuah chungchangah, School Education Minister chu phai lama a zin a lo haw mek a, a lo haw hunah thil fel tâwk lo leh siamṭhat ngai chu a ṭul angin hma kan la ang,' tiin a puang a ni.