Kan sorkar chhung rei loteah Hmasawnna nasa takin a thleng - Dr R Lalthangliana

Health minister Dr R Lalthangliana chuan nimin khan Mizo Hnam Runah thu sawiin, "Kan sorkar chhung rei loteah hmasawnna nasa tak a thleng," a ti.

Dr R Lalthangliana chuan thla kua leh kar thum chauh an la sorkar chhungin Chief Minister hoin thil tam tak an tih thu sawiin, "Sorkar hmasain kawng siamna a awm lo ti mah se, kan sorkar aṭanga rei lo teah kan Chief Minister-in kawng siam hna a ṭan thei nghal. Pathian in finna leh thiamna in kan CM hi a pui a ni," a ti. 

Tun hmaa la awm ngai lo sub-center, PHC, CHC zawng zawngah damdawi mamawh ang chu an dah kim deuh vek tawh tih sawiin Health Minister chuan, "Health department-in World Bank nen indawrin sub-center, PHC leh hospital-a building chhe tawh leh hmanraw thlak ngai hrang hrangte thlak turin ruahmanna siam a ni," an ruahmanna hi India sorkarin an pawmpui thuai a beisei thu a sawi.

Health Minister sawi danin, sub-center 400 chuang chu Health and Wellness Center-ah upgrade in B.Sc nurse dah an ni dawn a, chungmite chu training thla ruk pek an ni dawn. He hmalakna tur hi sub-center 40-ah kalpui hmasak a ni ang.

Delhi an kal ṭumin Congress sorkar hmasa in Hindi zirtirtu 1305 a ban takte,  Ministry of Human Resource Development-in an chhawr zui leh tur thu an lo hrilh tih sawiin Higher & Technical Education Mi­nister chuan, "Kar hnih thum chhunga tih fel theih kan beisei," a ti. 

RUSA hnuaia assistant professor 72 an lakte chu UGC scale anga rawihna tur chung­changah RUSA hotute hnenah CM in lehkha a thawn thu leh a hrana a mah pawhin a thawn thu a sawi a, "Tuna rawihna tur bakah kum hnih dang rawih belh lehna turin min rua­hmansak a ni," a ti a, Lunglei lamah MZU Campus din theih an in beisei thu a sawi.