Mipui beiseina awmchhunah ZPM ngai

Nimina ZPM pisaa inkhawmah ZPM consultant F Rodingliana'n thu a sawi a, sorkar kal tawh leh sorkar mekah thil thar beisei tur a awm lo tih sawiin, "Zoram mipuite beiseina awmchhun chu ZPM chiah hi a ni,” a ti.

F Rodingliana chuan, "Mizoramah sorkar thar kan nei ṭhin a, kalphung tharte han sawi ve ṭhin mah se, an thil tih dan leh an chêt dan aṭangin party sorkar bawk kan hmu leh ṭhin. Congress term hmasaah NLUP, a dawt lehah NLUP 

ṭha mi, MNF term hmasaah MIP, tunah SEDP, a vaiin Zoram chhiatpui sem policy vek a ni," a ti a; MNF leh Congress sorkarah thil thar dang a awm loh thu a sawi.

Lalmuanpuia Punte pawhin thu sawiin, MNF hoin vai an hlauh a la reh thei lo tih sawiin, "Union Home minister Amit Shah chuan hmarchhak mipui duh loh leh dodal em em, Citizenship Amendment Bill (CAB) campaign-a hmarchhak pumpui fan kual a tum a, NEDA a tel ve tho, Meghalaya CM Conrad Sangma leh Nagaland CM Niphiu Rio te chuan an dodal a, BJP party ngei sorkarna, Arunachal CM Pema Khandu leh Assam CM Sarbananda Sonowal-te pawhin dodalin, heng state pali-ah hian Amit Shah hian CAB campaign a nei thei lo," a ti.

Kum 20 chhung Mizoram zalenna suala rammu tawh MNF sorkar chiahin CAB leh Amit Shah-a campaign an dodal ngam lo tih sawiin Lalmuanpuia chuan, "Home Ministry hnuaia awm NEC-in chawpchilh takin Mizoram Industry department chu Handloom & Handicraft Exhibition a buatsaihtir a, zalen takin Amit Shah chuan CAB campaign a rawn nei ta a ni," a ti a; MNF hoin vai an hlauh ṭhin chu a reh thei lo niin a sawi.

Lalmuanpuia Punte chuan, state danga NEDA sorkar dangte’n an hnial thlak ṭhak ngam laiin, MNF sorkar erawh chuan a lo hnial ngam lo mai ni loin, lungawi lohna lantir tumte pawh an thlêm lungawi thei tih a sawi a, "A ṭhen tharum hmangin an ûm darh a. CAB duh lote'n an duh lohna an lo tihlan hlauin Aizawlah Cr.PC 144 hmangin mi panga aia tam awm khawm phal lohna an puang a, Chaltlang Bethel lungphun bula hmeichhe pathum lek pawndum sina ding pawh police-in an hnawtdarh a, ZPM ṭhalai poster tàrte pawh police-in an pawtthla bawk a ni. Heti khawpa MNF-in vai an hlau mai hi Mizo hnam ang pawhin a tlàwm thlakin a zahthlak a ni," a ti.