Mizoram State Games neih dan tur rêl

State Level Implementation and Monitoring Committee chu nimin khan Sports & Youth Services minister Robert Romawia Royte hoin an ṭhukhawm a, Mizoram State Games neih dan tur ngaihtuahin, intihsiak hun atan December 9-14, 2019 an ruahman.

Robert Romawia chuan, Mizoramin hun rei tak chhung State Games a neih loh avangin rin phâk bâkin chànna a nasa nia sawiin, "National level aṭanga international level leh, a bikin Olympic-ahte thlenga medal dawn theihna sport discipline tam tak kan ṭhalaite'n an theihnghilh tawhte a awm. Sport dicipline-te hi major game/discipline rualin kaihthawh kan tum a ni," a ti.

Thlèngthlawh (discuss throw), lungden (shotput), inzuansiak, mau hmanga inzuansiak (pole vault) leh a dangte chu a mal khaiin intihsiakna buatsaih a remchang ṭhin lo tih sawiin Minister chuan, "Medal dawn theihna ni mah se, hlamchhiah a hlawh zel a, ṭhalaite zingah hriat a hlawh ta mang lo. National Games-ah thlen san kan tum a, Olympic-ahte kan ṭhalaite tam zawka teltir kan tum chuan athletics lamah ṭan lak zel a ngai," a ti a; chu'ng atan chuan Mizoram State Games chu thil ṭha tak a nih tur thu a sawi.

Mizoram State Games SLIMC meeting-in a rêl dan chuan, State Games neihna hmunpui tur chu Aizawl a ni a, chutih rualin, sport discipline ṭhenkhat khelh remchang zawkte chu Kolasib, Kawnpui leh Thenzawlahte khelh a ni ang. Constituency, block, district leh state level-a buatsaih tur a ni.

Constituency chhunga buaipui tur leh a ṭul anga constituency contingent-te puala state level Organising Committee dawr turin constituency level Organising Committee siam an rêl a; Consti­tuency Organising Committee-ah chuan bialtu MLA chu chairman an ni ang. December 9-ah hawn a ni dawn a, hawnna inkhawm neih a nih hma pawhin game tam tak chu thlitfim hman tura ruahmanna siam a ni dawn.

Mizoram State Games hi open Competition a ni dawn a, junior leh senior level hrang hranga ṭhen a ni dawn lo. Sport discipline chi hrang 30-ah constituency 40 aiawh infiammite an intihsiak dawn a, official pawh mi 500 chuang an awm dawn a ni.