Bru rawn kîrte hnenah ṭanpuina pek a ni

Tripura refugee camp-a awm Bru, Mizoram mi dik takte hruai kîrna kal meka Mizorama rawn kir tawh zinga ṭhenkhat, Mamit district-a Tuidam leh Bawrai temporary shelter-a khawsa chhungkaw pasarihte chu October 5, 2019 khan Mamit DC Dr Lalrozama'n a tlawh a, ṭanpuina an dawn tur hmasa sum a hlân.

Mamit Bawrhsap hian Tuidam temporary shelter-a khawsa chhungkaw pakhat leh Bawrai khuaa let tawh chhung­kaw parukte hnenah in sakna tur sum first instalment Rs. 25,000 ṭheuh leh thla tina an dawn tur Rs. 5,000 ṭheuh a hlan a; puitling leh naupang zat milin a thlawna ei tur (free ration) leh free ration dawnna tur ration card a hlan bawk.

Dr Lalrozama chuan, Bru zinga Mizoram khua leh tuite hruai let hna kalpui meka Mizorama kîrte chu thinlung taka an lo lawm thu a sawi a; harsatna leh buaina an neihah an bialtu administration officer-te leh khawtlang hruaitute hrilh ṭhin tur leh an sum dawnte chu a nihna tur taka hmang turin a chah.

Bru lak let thawh 9-naa lêt hmasa berte zinga Lunglei district-a awm turte chuan October 5, Inrinni khan Lunglei an thleng a, 2nd Battalion MAP hmunpui, Luangmualah riahtir an ni. Lungleia awm tur lêt hmasate hi chhungkua 42-a mi 165 (puitling 105 leh naupang 60) an ni a; Lunglei DC K Lalrinzuali leh SP C Lalthanmawia te bakah, 2nd MAP commandant Saidingliana, Lung­lei chief medical officer Dr Thani Pachuau leh sorkar hotu dangte'n an lo hmuak a ni.

Lunglei Bawrhsap chuan, Mizoram Bru lak let chu sorkarin a ngaih pawimawh tak zet thu te, an chawlh lâwkna (temporary shelter) leh in an sakna tur hmun house plan site-te pawh mumal taka ruahman a nih tawh thu a sawi a; temporary shelter-ah hun rei tak an awm theih dawn loh avangin, in sa tura hma la nghal turin Bru chhungkuate chu a chah. Lunglei DC chuan in sakna tur sum hmasa (first instalment) Rs. 25,000 ṭheuh leh mamawh leina tur Rs. 5,000 ṭheuh a hlan nghal.

Bru-te hian Pathianni khan Lung­lei Luangmual aṭangin an awmna tur khua an pan leh nghal a, tlai lamah an awmna tur an thleng. Chhungkaw 42 zinga chhungkaw 24 (mi 100) chu Dintharah, chhungkaw pakua (mi 26) chu Putlungasihah, chhungkaw paruk (mi 28) chu Buknuamah leh chhungkaw pathum (mi 11) chu Chawilung ‘S’ an thleng a; an awmna turah hian medical team-in an hriselna an lo endiksak nghal zel a ni.