Amit Shah-a thusawi Mizoram tan A him tâwk loah MPC-in an ngai

Mizoram People Conference (MPC) party chuan, Union Home minister Amit Shah-a'n Citizenship Amendment Bill (CAB) chu sorkar laipuiin a kaltlangpui a nih pawhin, ILP nei state-teah ILP chu inhumhim nan hman zel a nih tur thu sawi mah se, Mizo ram leh hnam tan CAB pass chu a him chuang loa an ngaih thu an tarlang.

MPC party office bearer-te an president Lalhmangaiha Sailo hoa nimina ṭhukhawm chuan thu­chhuah siamin, "Amit Shah-a'n Ci­tizenship Amendment Bill (CAB) chu sorkar laipuiin a kaltlangpui a nih pawhin, ILP nei state-teah ILP chu inhumhim nan hman zel a nih tur thu sawi mah se, Mizo hnam tan a la him tâwk lo hleah kan ngai. CAB chungchanga a thusawi hian Mizoram a venghim zo dawn chuang lo tih Mizoram mipui hriat­ah kan puang a ni," an ti.

MPC thuchhuah chuan, "MPC party-in CAB kan dodal chhan lian ber chu, kan hnam leh sakhua chîmralna tura kawngka zau tak inhawnna a ni a. India ṭhenawm ram aṭanga dan loa lo lutte kum ruk an awm tlin chuan Indian citizenship (India mi nihna) pek tur an ni dawn a, kan ṭhenawm rama chêng Bengali, Chakma-te awlsam taka lo lutin, kum ruk an awm tlin chuan Mizoram mi leh sa an ni thei dawn a ni," a ti a; Mizo hnam tlem tête chu rei lo te chhunga an chîmral thei dawna an ngaih thu a tarlang.