Police disaster management training ṭan

Home minister Lalchamliana chuan Mizoram police-a Aizawl district executive force (DEF) tana ni nga awh tur 'Basic Disaster Ma­nagement Training' buatsaih chu nimin khan 5th IR Battalion Headquarters, Lungverhah a hawng.

Hawnna inkhawm hi DMR department joint director (OPS) C Lalruaia'n a kaihruai a; Lalcham­liana chuan, ram chhunga chhiatna hrang hrang hriat lâwk loh a thlen chángin police-te chu koh hmasak ber an ni ṭhin tih a sawi a, "Mizo­te chu a hnam angin tlawmngai thei leh mite ṭanpui peih hnam ni mah ila, khawvel changkang zelah digital media hmangin thu a darh chak a, chhiatna a thlenin a hmunah mipui pungkhawm an tam viau cháng a awm ṭhin. Heng hunah hian chêt awlsam zawk nan leh ruahmanna ṭha neih leh invenhimna chungchangah police-te'n mawhphurhna sang tak an nei a ni," a ti.

Home Minister chuan, "Nunna chhanhim khawngah te, ruang lak chhuah chungchangahte fumfe taka ruahmanna siam chu police-te hna leh mawhphurhna a ni," a ti a; training chu ni nga chhung chauh ni mah se, Zoram mipui tan ṭangkai taka training course kal chhuak tur leh theihtawpa zir turin a chah a ni.

Basic Disaster Management Training hi district hrang hrangah vawi li buatsaih tura ruahman a ni a, a vawi khatna Lungverhah hian havildar atanga inspector mi 22 an tel a; Champhai district aṭangin pathum, Serchhip district aṭangin pathum, Kolasib district aṭangin paruk leh Aizawl district aṭangin 10 an ni.