Supply Minister a nêp - MPYCC

Mizoram Pradesh Youth Congress Committee (MPYCC) chuan thuchhuah siamin, tunlaiin Mizoram hmun hrang hranga eirawngbawlna gas a harsat hle tih an tarlang a, "Supply Minister chak lo leh nêp kan nei hi a vanduaithlak hle a ni," an ti.

Congress ṭhalaite chuan, tunlaia gas harsatna thleng mek chu mangan­thlak an tih thu sawiin, "Gas phurtute nawrh thu hriat tur awm si loa mipuiin gas kan harsa reng mai hi hriatthiam a harsa tak zet a ni," an ti a; gas distributor-te'n IOC-ah gas man tur an pe (deposit) vek tawh chung­in a ni tèlin gas a harsa zual zel a, gas nghei vanga mangang Mizoram hmun tam takah an awm tawh tih an sawi.

Gas a harsat mek laiin a changtu, Food, Civil Supplies & Consumer Affairs minister K Lalrinliana hmalakna thâwm hriat tur a awm lo tih sawiin MPYCC chuan, "Gas harsatna vei miah loa a ngaihthah thei hi hriatthiam har kan ti hle a ni," an ti.

Congress sorkar liam taah fûr ruahtui tlak tam leh rei vanga kawng chhia te, gas phur motor-te rei tak an nawrh vang leh rél kawng siam vanga hun rei tak rel kawng dan (mega block) a ni chungin hnianghnar takin gas a awm reng niin MPYCC chuan an sawi bawk.